Umutwe wa AFC/M23 urwanya ubutegetsi bwa Repubulika Iharanira Demokarasi ya Congo, ku wa Kabiri tariki ya 9 Nzeri witabiriye inama ya 60 y’Akamana k’Umuryango w’Abibumbye gashinzwe uburenganzira bwa muntu.
Ni bwo bwa mbere uyu mutwe usanzwe warafatiwe ibihano n’Umuryango w’Abibumbye wari witabiriye igikorwa cyawo.
Muri iriya nama yabereye i Genève mu Busuwisi, intumwa za AFC/M23 zari ziyobowe na Maître Shyaka Jean Paul, umujyanama mu biro by’ubuhuzabikorwa bw’uriya mutwe.
Muri iyo nama yarimo intumwa z’ibihugu bitandukanye birimo na RDC ndetse n’u Rwanda, AFC/M23 yahawe amahirwe yo kwisobanura ku birego bikubiye muri raporo zitandukanye z’Umuryango w’Abibumbye zishinja uriya mutwe gukorera muri Kivu zombi ibikorwa bihonyora uburenganzira bwa muntu.
Ni raporo uyu mutwe wateye utwatsi, ugaragaza ko ibizikubiyemo ari ibinyoma.
Maître Shyaka by’umwihariko yabwiye Televiziyo ya Tele Renaissance ko abakoze ziriya raporo nta kindi bari bagamije kitari “gusiga isura mbi umuryango wacu”; ibyo yanagaragarije kariya kanama.
Kimwe mu byaha raporo za Loni zishinja M23 ni ubwicanyi uriya muryango uvuga ko bwakorewe abahinzi b’Abahutu barenga 300 bo muri Teritwari ya Rutshuru, muri Nyakanga uyu mwaka.
Maître Shyaka yavuze ko ibya buriya bwicanyi ari ibinyoma ndetse ko ubwo bwicanyi butigeze bubaho.
Ati: “Urugero iyo bavuze ko hishwe abantu 319 cyangwa 320 muri Parike ya Virunga, ni ibihimbano mu by’ukuri bikomoka mu muryango witwa ko ari uw’Uburenganzira bwa muntu, ariko mu by’ukuri bigaragara ko ari umuryango w’abahezanguni ugaburira FDLR. Berekanye ko biriya byabaye bagamije gusiga icyasha umuryango wacu.”
Loni yatumiye AFC/M23 nyuma y’ibihugu nka Qatar byatumiye uyu mutwe i Doha, aho umaze igihe uganirira na Leta ya Repubulika Iharanira Demokarasi ya Congo.
Mu Cyumweru gishize Thabo Mbeki wahoze ari Perezida wa Afurika y’Epfo na we yatumiye uriya mutwe mu biganiro n’abanye-Congo batandukanye byari bigamije gushakira amahoro igihugu cyabo.
Ababikurikiranira hafi bemeza ko kuba AFC/M23 ikomeje gutumirwa mu mahanga bisobanuye ko Umuryango Mpuzamahanga wamaze kugenda wumva impamvu irwana; bitandukanye no mu myaka yashize ubwo Leta ya Kinshasa yagendaga iwita umutwe w’iterabwoba.
