Minisiteri y’Ubuzima kuri uyu wa Gatandatu yatangaje ko mu gihugu habonetse abantu 100 banduye icyorezo cya Covid-19, mu gihe abo cyahitanye ari babiri.
Abarwayi bashya babonetse barimo 52 b’i Kigali, 21 b’i Rubavu, 9 b’i Huye, 7 bo mu Ruhango, 4 b’i Rusizi, 4 b’i Muhanga, 2 bo mu Gakenke n’umwe w’i Rwamagana.
Abitabye Imana bo ni umukobwa w’imyaka 14 n’umugabo w’imyaka 61; bituma abamaze guhitanwa na kiriya cyorezo mu gihugu bagera kuri 56.
Magingo aya abamaze kwandura COVID-19 mu Rwanda barabarirwa muri 6, 528, barimo abamaze gukira 5,892. Abantu 580 ni bo bakirwaye COVID-19.
Abanyarwanda turasabwa iki?
Umunyamabanga wa Leta muri Minisiteri y’Ubuzima, Dr Mpunga Tharcisse, yatangarije RBA ko urwego icyorezo cya COVID-19 kigezeho mu Rwanda ari habi cyane kurusha ibihe byabanje, bitewe n’uko umubare w’abarembye n’abicwa na cyo ukomeje kwiyongera bidasanzwe.
Minisitiri w’Ubuzima, Dr Daniel Ngamije yunzemo ko “COVID-19 iduteye impagarara kubera ukwiyongera kw’abandura n’abo yica. Twese turasabwa kubahariza amabwiriza yo kuyirinda.Ufite ibimenyetso akihutira kujya kwa muganga akitabwo vuba.”
Abanyarwanda kandi barasabwa kwimakaza agapfukamunwa, isuku, intera hagati y’umuntu n’undi no kwirinda ingendo zitari ngombwa.
