Urwego rw’Umuryango w’Abibumbye rushinzwe gukurikirana abakoze ibyaha, IRMCT, rwatangaje ko Lt Col. Munyarugarama Phénéas rwashakishaga kubera uruhare yakekwagaho muri jenoside yakorewe Abatutsi mu 1994, yapfuye mu myaka 20 ishize.
Nk’uko byatangajwe n’Umushinjacyaha Mukuru w’uru rwego, Serge Brammertz, iperereza rwakoze ryagaragaje ko Munyarugarama yapfiriye mu gace ka Kankwala muri Repubulika ya Demukarasi ya Congo (RDC) ku wa cyangwa mbere ya tariki ya 28 Gashyantare 2002, azize uburwayi.
Munyarugarama yakurikiranywe nk’uwahoze ari Komanda w’ikigo cya gisirikare cya Gako, akaba yarashinjwaga uruhare muri jenoside yakorewe Abatutsi muri Bugesera, barimo abari barahungiye muri Ntarama no muri kiliziya ya Nyamata.
Muri Kamena 1994, yahungiye muri RDC yitwaga Zaïre, hamwe n’abandi bahoze mu ngabo z’igihugu n’abari mu mutwe w’Interahamwe barema umutwe witwaje intwaro urwanya Leta, waje guhindura izina, witwa FDLR.
Inkuru yemeza urupfu rwa Munyarugarama ikurikiye iya Protais Mpiranya, wabaye Komanda w’umutwe w’ingabo zarindaga Juvénal Habyarimana, na we wakurikiranywagaho uruhare muri jenoside yakorewe Abatutsi.
Mu cyumweru gishize, Brammertz yatangaje ko mpiranya yapfiriye muri Zimbabwe mu Kwakira 2006.
