Hashize iminsi 44 Perezida Paul Biya avuye muri Cameroun ubwo hari ku Cyumweru, itariki ya 7 Kamena 2026, mu rugendo abaturage ba Cameroun bari babwiwe ko ari “urugendo rugufi bwite i Burayi” ari kumwe n’umugore we. Kuva icyo gihe, uyu muperezida w’imyaka 93 ntarasubira mu gihugu cye. Impuha ku bijyanye n’uko yaba ameze neza cyangwa ameze nabi bikomeje kugaruka cyane mu bitangazamakuru no mu biganiro by’abaturage. Hari n’umudepite utavuga rumwe n’ubutegetsi wasabye Inama Nkuru Ishinzwe Itegeko Nshinga gutangaza ko ubutegetsi bwagiye mu kiruhuko. Ariko, ishyaka rye ririmo kugerageza guturisha abantu no kubaha icyizere.
“Nta cyuho kiri mu buyobozi. Intare ntaho yagiye,” Uyu ni Christophe Mien Zok, ushinzwe icengezamatwara mu ishyaka RDPC, mu nyandiko yo ku wa 15 Nyakanga yasohotse mu kinyamakuru “L’Action” cy’iryo shyaka riri ku butegetsi.
Nk’uko inkuru dukesha RFI ivuga, muri Cameroun, ukutagaragara igihe kirekire kwa Perezida Paul Biya w’imyaka 93, uherutse kuva mu gihugu ku itariki ya 7 Kamena yerekeza i Burayi mu rugendo rwihariye rugufi, bikomeje gutuma habaho ibibazo byinshi n’amakenga.
Kuva yagenda, imbuga nkoranyambaga zikoreshwa na Perezidansi ya Cameroun zagiye zitangaza ubutumwa bugenewe abandi bakuru b’ibihugu, urugero nko gushimira Emmanuel Macron ku munsi mukuru w’igihugu cy’u Bufaransa wizihizwa ku itariki ya 14 Nyakanga, cyangwa gushimira Perezida wa Montenegro ku munsi mukuru w’igihugu cye wizihizwa ku wa 13 Nyakanga. Icyakora, nta yandi makuru yerekeye umukuru w’igihugu yigeze ashyirwa ahagaragara.
Nubwo abasesenguzi batandukanye bemera ko Inama Ishinzwe Itegeko Nshinga ikwiye gutangaza ko hari icyuho cy’ubuyobozi nyuma y’iminsi 45, nta tegeko rigenga igihe Umukuru w’Igihugu ashobora kumara atari mu gihugu. Ishyaka UDC, ryibutsa ko nta Visi Perezida wigeze ashyirwaho kuva habaho ivugururwa ry’Itegeko Nshinga muri Mata, “risaba ko habaho igikorwa cy’inzego zigamije gushyiraho uburyo bunoze bwo kugenzura igihe kirekire Umukuru w’Igihugu amara adahari.”
Mu nyandiko ye yo ku wa 15 Nyakanga, Christophe Mien Zok, yanenze abantu “bigira nk’aho Cameroun iyoborwa mu buryo bw’iyakure.” Yandika ko ari bo “ba mbere mu kubara buri munsi igihe Paul Biya amara hanze y’igihugu no gusaba ko agaruka.”
