Ikipe y’igihugu ya Guinée Conakry izakina n’Amavubi y’u Rwanda mu mukino wa 1/4 cy’irangiza cya CHAN iri kubera mu gihugu cya Caméroun, ni yo kipe iri muri ririya rushanwa ifite abakinnyi bato kurusha ayandi.
Amavubi azisobanura na Guinée ku cyumweru, mu mukino uzabera kuri Stade ya Limbé aheruka kuboneraho itike ya 1/4 cy’irangiza atsinze Togo ibitego 3-2.
Amavubi yakomeje ari aya kabiri mu tsinda n’amanota atanu, nyuma yo kunganya 0-0 na Uganda Cranes cyo kimwe na Maroc, agatsinda Togo mu mukino wa nyuma wo mu tsinda.
Guinée yo yageze muri 1/4 cy’irangiza ari iya mbere mu tsinda D, nyuma yo kunyagira Namibia ibitego 3-0, ndetse ikananganya na Zambia cyo kimwe na Tanzania.
Imibare yerekana ko abakinnyi ba Guinée bari muri CHAN bafite impuzandengo y’imyaka 22 n’amezi abiri ibagira ikipe ifite abakinnyi bato kurusha ayandi muri 16 yari yitabiriye ririya rushanwa.
Amavubi bazahura ari ku mpuzandengo y’imyaka 24 n’amezi atanu. Ngendahimana Eric ni we mukuru kurusha abandi n’imyaka 31 n’iminsi 59, mu gihe Lague Byiringiro ari we muto n’imyaka 20 n’amezi atatu.
Ikipe y’igihugu ya Maroc ni yo ifite abakinnyi bakuze kurusha ayandi, dore ko bari ku mpuzandengo y’imyaka 27 n’amezi abiri.
Namibia yamaze gusezererwa yari ifite abakinnyi bari ku mpuzandengo y’imyaka 26 n’amezi abiri, aba Libya bakaba ku mpuzandengo y’imyaka 26 mu gihe aba Zambia bari ku mpuzandengo y’imyaka 25 n’amezi atanu.
Uko amakipe 16 yari muri CHAN 2020 arutana mu myaka
1. Maroc: 27,2
2. Namibia: 26,2
3. Libya: 26
4. Zambia: 25,5
5. Niger: 25,3
6. Zimbabwe: 24,9
7. Mali: 24,9
8. Tanzania: 24,8
9. Burkina Faso: 24,6
10. U Rwanda: 24,5
11. RDC: 24,3
12. Caméroun: 24,2
13. Togo: 23,5
14. Uganda: 23
15. Congo-Brazza: 22,7
16. Guinée Conakry: 22,2
