Ikipe y’Igihugu ya Maroc ‘Les Lions de l’Atlas’, yageze ku mukino wa nyuma wa CHAN nyuma yo gutsindira Caméroun imbere y’abafana bayo ibitego 4-0.
Hari mu mukino wa 1/2 cy’irangiza wabereye kuri Stade ya Limbé.
Ni Maroc yarushaga Caméroun mu mpande zose z’ikibuga, mu gihe abavandimwe b’Abanya-Caméroun bo bakinaga imipira miremire yo kujugunya.
Ukurushwa kwa Caméroun gushimangirwa no kuba yarangije iminota 90 y’umukino nta shoti na rimwe rigana mu izamu iteye, mu gihe abanya-Maroc bateye amashoti 9 agana mu izamu.
Umunota wa 28 w’umukino wari uhagije ngo Soufiane Bouftini afungurire Abarabu amazamu, mbere y’uko kabuhariwe Soufiane Rahimi atsinda igitego cya kabiri cyajyanye Maroc mu kiruhuko iri imbere n’igitego 2-0.
Ku munota wa 73 Rahimi yatsinze igitego cya gatatu, Mohammed Bemammer atsinda agashinguracumu ku munota wa 82 w’umukino.
Maroc ifite igikombe cya CHAN giheruka, izahurira ku mukino wa nyuma na Mali yawugezeho nyuma yo gusezerera Guinea-Conakry kuri penaliti 5-4.
