Abahanzi bakunze guhabwa impano zitandukanye n’abafana babo mu bitaramo, zirimo amafaranga, udupapuro twanditseho ubutumwa, n’ibindi. Icyakora, rimwe na rimwe, hari impano ziba zidasanzwe cyangwa zitangaje.
Umuhanzikazi Cindy Sanyu aherutse gutangaza imwe mu mpano itangaje yigeze guhabwa ari ku rubyiniro. Mu kiganiro n’abafana be (Q&A), yavuze ko yigeze guhabwa cocaine hagati mu gitaramo.
Cindy Sanyu yatangaje ibi avuga ko byamuteye urujijo rukomeye ati: “Impano itangaje kurusha izindi umufana yigeze kumpa ku rubyiniro ni cocaine.”
Uyu muhanzikazi yanamaganye ibihuha byavugaga ko akunda gukoresha ibiyobyabwenge mbere yo kuririmba.
Cindy yabisobanuye agira ati: “Ikintu cy’ibinyoma cyambayeho ni uko hari abafana bizeye ko mbere yo kujya ku rubyiniro ngomba kubanza gusinda cyangwa gufata ibiyobyabwenge. Ibyo si ukuri.”
Aya magambo ye yagaragaje ko adakunda gukoresha ibiyobyabwenge ndetse ko ibyo avuga bidakwiye guhindurwamo ibindi n’abamwumva.
