Guy Brice Parfait Kolelas wari uhatanye na Perezida Denis Sassou Ngessou mu matora y’umukuru w’igihugu cya Congo-Brazzaville yabaye ejo ku cyumweru, yitabye Imana kuri uyu wa Mbere.
Inkuru y’urupfu rwa Parfait Kolelas w’imyaka 61 y’amavuko, yemejwe na Christian Cyr Rodrigue Mayanda wari ukuriye ibikorwa bye byo kwiyamamaza.
Uyu yabwiye AFP ko Kolelas yari yajyanwe mu bitaro buracya haba amatora yo ku Cyumweru, aho yari yagiye kuvurirwa icyorezo cya COVID-19 cyamuhitanye.
Ati: “Kolelas yapfiriye mu ndege y’ubuvuzi yaje ku mufata i Brazzaville ku gicamunsi cyo ku Cyumweru.”
Ku wa Gatandatu abagize umuryango w’uriya munya-Politiki bari batangarije Associated Press ko ari kuvurirwa muri bimwe mu bitaro byigenga by’i Brazzaville nyuma yo kwandura Coronavirus.
Mbere yaho ku wa Gatanu hari amashusho yakwirakwiye ku mbuga nkoranyambaga agaragaza Kolelas ari kuri bomboni yo kumwongerera umwuka.
Muri ayo mashusho yumvikana agira ati: “Nshuti dusangiye urugendo, ndi mu kaga. Ndi kurwana n’urupfu. Ariko ndabasaba guhaguruka mugatora impinduka. Sinakabaye ndwanira ubusa.”
Nyakwigendera Guy Brice Parfait Kolelas asanzwe ari umuhungu wa Bernard Kolelas wabaye Minisitiri w’Intebe wa Congo mu 1997, ubwo iki gihugu cyari cyugarijwe n’intambara ya gisivili.
Uyu mugabo yari yarakunze kumvikana anenga ubutegetsi bwa Perezida Denis Sassou Ngessou avuga ko Repubulika ya Congo Brazzaville yabaye “Leta ya Polisi”.
Mu matora y’umukuru w’igihugu yo muri 2016, Kolelas yari yabaye uwa kabiri mu kugira amajwi menshi (15%), inyuma ya Perezida Denis Sassou Ngessou.
Mu matora yabaye ejo yafatwaga nk’umukeba ukomeye wa Perezida Ngessou wayoboye kiriya gihugu kuva mu myaka 36 ishize.
Kurikira ibiganiro n’amavidewo binyura kuri Bwiza TV
