Guverinoma ya Côte d’Ivoire yasabye iy’u Burundi kuzashyigikira umukandida wayo, mu matora ya Perezida w’Impuzamashyirahamwe y’Umupira w’Amaguru muri Afurika (CAF) ateganyijwe mu kwezi gutaha.
Ni ibikubiye mu butumwa Claude Paulin Danho, Minisitiri wa Siporo muri Côte d’Ivoire akanaba intumwa yihariye ya Perezida Alassane Ouattara yari yashyikirije Perezida w’u Burundi, Gen Evariste Ndayishimiye.
Kuri uyu wa Gatatu Minisitiri wa Siporo muri Côte d’Ivoire yari mu ruzinduko rw’akazi mu Burundi ku butumire bw’iki gihugu, yasize asabye leta yacyo kuzashyigikira umukandida w’igihugu cye mu matora ya Perezida wa CAF.
Amatora y’ugomba kuyobora CAF mu myaka itanu iri imbere, ateganyijwe kubera i Rabat muri Maroc ku wa 12 Werurwe.
Magingo aya abakandida batanu barimo n’umunya-Côte d’Ivoire, Jacques Anouma usanzwe ari Perezida w’Ishyirahamwe ry’Umupira w’Amaguru muri kiriya gihugu bari mu bazahatanira kuyobora iriya nzu igenga ruhago ya Afurika.
Abandi ni Augustin Senghor usanzwe ari Perezida w’Ishyirahamwe ry’Umupira w’amaguru muri Sénégal, Ahmed Yahya usanzwe ari Perezida w’Ishyirahamwe ry’Umupira w’Amaguru muri Maurtanie cyo kimwe n’umuherwe Patrice Motsepe usanzwe ari Perezida wa Mamelodi Sundowns yo muri Afurika y’Epfo.
Undi byitezwe ko aziyamamariza kuyobora CAF ni umunya-Madagascar, Ahmad Ahmad, usanzwe ari Perezida wayo, nyuma y’uko TASS itesheje agaciro ibihano FIFA yari yaramufatiye byo kutagaragara mu bikorwa by’umupira w’amaguru.
Ni ukubera ibyaha bishingiye kuri ruswa n’icyenewabo yaregwaga.
