Perezida wa Leta Zunze Ubumwe z’Amerika, Donald Trump kuri uyu wa 17 Mata 2020 yagaragaje ko ashyigikiye abaturage bo muri leta eshatu bigaragambiriza ibwiriza ryo kuguma mu rugo mu rwego rwo gukumira icyorezo cya Covid-19.
“Mubohore Minnesota, mubohore Michigan, Mubohore Virginia.” Ubu ni ubutumwa yashyize ku mbuga nkoranyambaga akoresha, abakurikiranira bya hafi ibiri kubera muri izi leta eshatu babona ko nta kindi yari agamije kitari gushyigikira abaturage bigaragambya basaba ubuyobozi kubemerera gusohoka mu nzu.
Guverineri wa Minnesota, Tim Walz, Gretchen Whitmer wa Michigan ndetse na Ralph Northam wa Virginia bategetse abaturage guhagarika ibikorwa byabo, bakajya mu ngo zabo kugira ngo birinde ikwirakwira ry’iki cyorezo, hiyongereyemo abo muri Ohio, Utah na Kentucky.
Abaturage bavuze ko iri bwiriza rikakaye ku buryo ryatumye habaho ibihombo ku bikorwa bibinjiriza amafaranga, ingingo bemerenyaho na Trump muri izi ntara eshatu yavuze.
Guverineri Tim Walz yasubirije Donald Trump kuri Twitter, amubaza ati: “Ese muratekereza ari iki twari gukora gitandukanye n’icyo twakoze?”
Ubutumwa bwa Donald Trump bwateye abantu kwibaza niba atari ivangura rishingiye ku mashyaka ya politiki uyu Mukuru w’Igihugu yazanye kuko izi leta yavuze ziyobowe n’abari mu ishyaka rya ‘Democrate’ ritandukanye n’iryo arimo (Republican). Bibaza impamvu atavuze izindi leta nka Ohio na Utah [ziyobowe n’abari muri Republican] kandi nazo zarahagarikiwe ibikorwa bitandukanye.
Kudahuza umurongo hagati ya Donald Trump na ba guverineri kurakomeje mu gihe imibare y’abandura iki cyorezo mu gihugu ayoboye ikomeza gututumba, ikaba irenga 734,500 mu gihe abamaze gupfa barenga 38,768.
Intara zimwe na zimwe kandi zikomeje kugaragaramo abanduye benshi cyane, aho New York ifite abarenga 131,200, mu gihe abamaze gupfa barenga 8,893. Michigan imaze kugaragaramo abanduye barenga 30,000, abapfuye barenga 2,200. Minnesota imaze kugaragaramo abanduye barenga 2000, mu gihe abapfuye barenga gato 100 naho Virginia imaze kugaragaramo abanduye barenga 5200 n’abapduye 21.
