Umunya-Portugal Cristiano Ronaldo, yanduye icyorezo cya Covid-19, nk’uko byatangajwe n’Ishyirahamwe ry’Umupira w’Amaguru mu gihugu cya Portugal.
Itangazo iryo shyirahamwe ryasohoye rivuga ko “Cristiano ameze neza, nta bimenyetso agaragaza, akaba ari mu kato.”
Uyu rutahizamu w’Ikipe ya Juventus, yaherukaga kugaragara mu mikino ibiri ikipe y’igihugu cye anabereye Kapiteni iheruka gukina, harimo uwa gicuti yakinnye na Espagne n’uwa UEFA Nations league yakinnyemo na Les Bleus y’Ubufaransa. Ni imikino yombi yanganyije 0-0.
Nyuma y’iyo mikino uyu mugabo w’imyaka 35 y’amavuko yashyize ifoto ku mbuga nkoranyambaga ze ari gufasangira ifunguro na bagenzi be bakinana mu kipe y’igihugu.
Ishyirahamwe ry’Umupira w’Amaguru muri Portugal ryavuze ko abandi bakinnyi bose bisuzumishije nta wagaragayeho kiriya cyorezo.
Kwandura Coronavirus kuri Cristiano Ronaldo bisobanuye ko atazagaragara mu mikino irimo uwo Portugal izakina na Suède muri UEFA Nations league, ndetse n’uwo Juventus izakinamo na Crotone muri Shampiyona y’Abataliyani.
Ronaldo kandi ntazagaragara mu mukino w’itsinda rya UEFA Champions league Juventus izahuriramo na Dynamo Kiev.
