Guverinoma y’u Bwongereza yavuze ko indege mpuzamahanga zahagaritswe kugwa cyangwa guhaguruka ku Kibuga cy’Indege cya Dar es Salaam, kandi ko Ikibuga cy’Indege cya Arusha hamwe n’ikindi cyegereye Umusozi wa Kilimanjaro byafunzwe.
Ni nyuma y’uko Ambasade ya Amerika yagiriye inama abaturage bayo bari muri Tanzania ibasaba gushaka aho bikinga aho, ibabuza kugenda mu mihanda ivuga ko byabateza akaga gakomeye kandi ingendo nyinshi mpuzamahanga zahagaritswe.
Magoti yagize ati: “Abaturage bari kongera kwandika umuco wa politiki wacu tureka kuba inka, niba nkoresheje iri jambo mu cyubahiro,…tuba abaturage bakora.”
Iyi myivumbagatanyo yabaye ikigeragezo kuri Samia Suluhu Hassan, wahawe amashyi nyuma yo gutangira imirimo ye mu 2021 kubera koroshya gukandamiza abatavuga rumwe n’ubutegetsi ndetse no kugenzura itangazamakuru byari byariyongereye ku butegetsi bwa John Magufuli.
Mu myaka ishize ariko, abaharanira uburenganzira bwa muntu n’abakandida batavuga rumwe n’ubutegetsi bashinje guverinoma ye ishimutwa ridasobanutse ry’abanenga ubutegetsi.
Perezida Suluhu Hassan yavuze mu mwaka ushize ko yategetse ko hakorwa iperereza kuri raporo z’ishimutwa, ariko nta byarivuyemo byigeze bishyirwa ku mugaragaro.
Imyigaragambyo yatangiriye mu murwa mukuru w’ubucuruzi Dar es Salaam no mu yindi mijyi mu gihe cyo gutora ku wa Gatatu kubera ko Perezida Samia Suluhu Hassan yaheje mu matora babiri bakomeye batavuga rumwe bahataniraga umwanya wa perezida, ndetse n’ibyo abigaragambyaga bavuga ko guverinoma yongereye gukandamiza rubanda.
