Donald Trump yavuze ko ari gutegurira u Bushinwa igihano

Perezida wa Leta Zunze Ubumwe z’Amerika, Donald Trump kuri uyu wa 14 Gicurasi 2020 yavuze ko ari gutegurira u Bushinwa igihano bitewe n’uburangare abushinja ku cyorezo cya Covid-19.

Uyu Mukuru w’Igihugu nk’uko biri mu nkuru ya VOA, yavuze ko mu bihano igihugu cye kizaha u Bushinwa harimo guhagarika imigenderanire, ubuhahirane n’ibindi, akaba abona ko byateza igihombo iki gihugu cya kabiri mu bukungu kuri iyi Si.

Donald Trump akomeje gushinja u Bushinwa guhisha amakuru y’iki cyorezo, bubifashijwemo n’Umuryango Mpuzamahanga wita ku Buzima, WHO. Avuga ko igihe byatangarijwe ko umuntu wanduye iki cyorezo yakwanduza mugenzi we, cyatinze kandi ba nyirubwite barabisobanukiwe mbere.

Ikindi kandi, we abona uyu muryango waratinze gutangaza ko Covid-19 ari icyorezo cyugarije Isi, u Bushinwa bubigizemo uruhare.

Leta Zunze Ubumwe z’Amerika zimaze kubonekamo abantu barenga 1,457,000 banduye iki cyorezo, abapfuye barenga 86,900. Ni mu gihe mu Bushinwa habonetse umurwayi wa mbere hagaragaye abanduye barenga 82,000, abapfuye barenga 4,600. Abamaze kwandura ku Isi yose barenga 4,500,000, mu gihe abapfuye barenga 303,500.