Ijumaa hii, siku moja baada ya Kyiv na Washington kusaini makubaliano muhimu ya madini, mashambulizi ya ndege zisizo na rubani (drones) kutoka Urusi yamewajeruhi watu wasiopungua 29 — wakiwemo watoto — katika mji wa Zaporizhzhia ulioko kusini-mashariki mwa Ukraine.
Gavana wa eneo la Zaporizhzhia, Ivan Fedorov, alisema kwamba “watu 29 walijeruhiwa kufuatia shambulio la usiku lililotekelezwa na adui” katika mji huo wa viwanda kusini-mashariki mwa Ukraine. Aliongeza kuwa mtoto mwenye umri wa miaka 13 alikuwa miongoni mwa waliojeruhiwa kwenye shambulio hilo la drones.
Kupitia ujumbe kwenye mtandao wa Telegram, Fedorov alisema: “Warusi walishambulia miundombinu ya kiraia mjini hapa. Majengo ya makazi, chuo kikuu na miundombinu mingine iliharibiwa.”
Alifafanua kuwa jeshi la Urusi lilitekeleza mashambulizi yaliyozidi kumi dhidi ya mji huo, yakiharibu nyumba za watu binafsi, majengo ya ghorofa ya kuishi, taasisi za elimu na miundombinu mingine muhimu, kwa mujibu wa taarifa ya France24.
Fedorov pia alisema kuwa watu watatu waliokolewa kutoka kwenye vifusi, na wengine kumi na wawili walikuwa wakipatiwa matibabu hospitalini.
Wakati huo huo, jeshi la anga la Ukraine lilitangaza kuwa limepiga chini drones 64 kati ya 150 zilizotumwa na Urusi usiku kucha. Drones 62 zilizobaki hazikuweza kufikia malengo yao, kutokana na hatua za vita vya kielektroniki zilizowekwa na Ukraine kudhibiti mashambulizi hayo.