Rutahizamu wa Rayon Sports, Elie Tatou, yongeye gushyirwa ku rutonde rw’abakinnyi bazerekeza muri Mozambique gukina umukino wo kwishyura na Black Bulls, nyuma yo kutagaragara mu mukino ubanza iyi kipe yatsinzwemo ibitego 2-0.
Uyu mukino wo kwishyura w’ijonjora rya kabiri rya CAF Confederation Cup uteganyijwe ku wa Gatandatu, tariki ya 24 Ukwakira 2026, kuri Lalgy Arena.
Kudahamagarwa kwa Elie Tatou mu mukino ubanza wabereye kuri Stade Amahoro byakuruye impaka mu bafana ba Rayon Sports, nyuma y’amakuru yavugaga ko yaba yari afitanye ubwumvikane buke n’umutoza mukuru, Francis Haringingo.
Abajijwe impamvu atakoresheje uyu mukinnyi, Haringingo yasobanuye ko ari icyemezo yafashe mu rwego rwa tekiniki.
Yagize ati: “Ni icyemezo cyanjye cya tekiniki.”
Nyuma yaho, Tatou yandikiye abakunzi ba Rayon Sports abinyujije kuri Instagram, asobanura ko yubaha ibyemezo by’umutoza n’uburyo ahitamo gukinisha ikipe.
Yagize ati: “Kudashyirwa ku rutonde rw’abakinnyi bazakina umukino ntibihindura ubwitange mfitiye iyi kipe ikomeye, intego zanjye cyangwa icyemezo cyanjye cyo kugira uruhare mu ntsinzi yayo.”
Nubwo uyu mukinnyi yasobanuye aho ahagaze, haracyari ibibazo ku byatumye adahamagarwa mu mukino ubanza.