Ethiopia: Imirwano yubuye mu Ntara ya Afar nyuma y’aho TPLF ishinje leta ubushotoranyi

Inyeshyamba zo mu ntara ya Tigray zo mu mutwe wa TPLF ziravuga ko kuri uyu wa Kabiri zashotowe bikaba ngombwa ko zigaba igitero ku ngabo za leta mu Ntara ya Afar.

Ubuyobozi bwa TPLF buvuga ko mu gitondo cyo kuwa Mbere abarwanyi bayo bahanganye n’abarwanyi bo mu Ntara ya Afar bashyigikiwe na Leta ya Ethiopia.

Abarwanyi ba TPLF bavuga ko nta mugambi bafite wo kuguma mu Ntara ya Afar kandi batifuza ko intambara zongera kwaduka.

Ibi biravugwa mu gihe hashize ukwezi kurenga TPLF itangaje ko yakuye abarwanyi bayo mu ntara za Afar na Amhara ahatangiriye intambara yahuje inyeshyamba na Leta ya Ethiopia mu Kwakira 2020 nk’uko iyi nkuru dukesha VOA ivuga.

Kuvana ingabo zayo muri iyi ntara byari byatanze icyizere cy’uko intambara igiye guhagaragara ariko siko byagenze.

TPLF ivuga ko inyeshyamba zo muri Amhara zishyigikiwe na leta zongereye ibitero ku birindiro byayo muri iyi minsi nk’uko yabitangaje mu itangazo ryo kuri uyu wa Kabiri ushize.

TPLF ikaba ivuga ko ibyo bitero bigamije guhungabanya ibikorwa by’ubutabazi n’umutekano mu murwa mukuru wa Tigray uherereye mu birmetero 50 uvuye muri Afar.

Igisirikare cya Leta ya Ethiopia giherutse gutangaza ubwacyo ko kirimo kwitegura kwinjira mu murwa mukuru wa Tigray kikarandura TPLF burundu.