Ikipe y’igihugu y’u Butaliyani yashimangiye itike yayo ya 1/8 cy’irangiza cy’irushanwa ry’Igikombe cy’u Burayi (Euro 2020), nyuma yo gutsinda Wales mu mukino wa nyuma wo mu tsinda A igitego 1-0.
Igitego cyo ku munota wa 39 w’umukino cya Matteo Pessina wari winjiye mu kibuga asimbura, ni cyo cyafashije u Butaliyani bwari bwakoresheje ikipe ya kabiri gutsinda Wales y’abakinnyi 10, gusa amakipe yombi azamukana mu itsinda.
U Butaliyani bwasoje imikino yabwo yose mu tsinda nta n’umwe butsinzwe (yose bwarayitsinze), ndetse yemwe nta n’igitego na kimwe bwinjijwe.
Ni nyuma yo kunyagira Turkiya ibitego 3-0 mu mukino ufungura Euro 2020, bunyabika u Busuwisi ibitego 3-0 mbere yo kwirenza Wales ku gitego 1-0.
Ni bwo bwa mbere kuva mu 1980 ubwo irushanwa rya Euro ryagurwa ikipe itsinze imikino yose yo mu tsinda kandi ntiyinjizwe igitego.
Iyi kipe y’umutoza Roberto Mancini kandi yuzuzaga iminota irenga 1,000 imaze itarinjizwa igitego, n’imikino 11 yikurikiranya itinjizwa igitego.
U Butaliyani buheruka kwinjizwa igitego ku itariki ya 14 Ukwakira 2020, ubwo bwagwaga miswi n’u Buholandi igitego 1-1.
Gutsinda Wales byanatumye Abataliyani buzuza imikino 30 yikurikiranya badatsindwa, kuva ku itariki ya 10 Nzeri 2018 ubwo batsindwaga na Portugal igitego 1-0, mu mukino wa UEFA Nations League wari wabereye i Lisbon.
