Ingabo za Repubulika Iharanira Demokarasi ya Congo, FARDC, zivuga ko ku Cyumweru zishe abarwanyi babiri b’inyeshyamba z’Abarundi za Red-Tabara zifata rwa mpiri (rwa mikono) abandi batanu. FARDC ivuga ko abo barwanyi baguye ahitwa Kibirizi mu kibaya cya Rusizi Teritwari ya Uvira, Intara ya Kivu y’Epfo nk’uko VOA dukesha iyi nkuru ibivuga. Umuvugizi wa FARDC muri ako karere, Major Dieudonne Kasereka, avuga ko “Abo barwanyi barashwe bari bavuye i Burundi bagiye gufasha Mai Mai Kijangala usanzwe ateza umutekano muke abaturage batuye mu kibaya cya Rusizi.” Ku ruhande rw’umuvugizi w’inyeshyamba z’Abarundi za Red-Tabara, Patrick Nahimana, anyomoza ibivugwa na FARDC, ko hari abarwanyi ba Red-Tabara bishwe abandi barafatwa. Umuyobozi wa sosiyete sivili mu kibaya cya Rusizi, Bernard Kadogo, ashimira FARDC yarashe abo barwanyi b’Abarundi bari bagiye gufasha Mai Mai Kijangala uri Rugeji mu misozi iri haruguru ya Luberizi. Uyu umuyobozi atangaza ko Mai Mai Kijangala akoresha rumwe mu rubyiruko rw’Abarundi ruba ruvuye i Burundi mu kunyaga inka, gushimuta abantu ndetse no kunyaga abagenzi baba bari mu modoka ziba zivuye mu mujyi wa Uvira zijya mu mujyi wa Bukavu. Kuwa 5 Ukwakira 2021, inzego zishinzwe umutekono zari zafatiye mu mukwabu Abarundi 30 muri Sange mu kibaya cya Rusizi bashinjwa kuba barinjiye muri Kongo mu buryo bunyuranijwe n’amategeko ,abandi bari bagiye mu mitwe yitwaje ibirwanisho ikorera muri iyi teritware ya Uvira.
Bamwe mu barwanyi FARDC yerekanye ivuga ko ari bo muri Red-Tabara yafashe mpiri/VOA
