Mu ijoro ryakeye Impuzamashyirahawe y’Umupira w’amaguru ku Isi (FIFA), yaraye itanze ibihembo by’abiganjemo abakinnyi n’abatoza bahize abandi ku Isi mu mwaka wa 2020.
Nko mu bagabo umukinnyi wahize abandi ni umunya-Pologne, Robert Lewandowski ukinira Bayern Munich yo mu Budage, nyuma yo kuyitsindira ibitego 55 mu mwaka w’imikino ushize akayihesha ibikombe birimo icya Shampiyona, DFB-Pokal, UEFA Champions league na Super Cup y’i Burayi no mu Budage.
Lewandowski yegukanye kiriya gihembo ahigitse Lionel Messi na Cristiano Ronaldo bari bagihataniye.
Umutoza w’umwaka mu bagabo yabaye Umudage Jürgen Klopp utoza Liverpool yo mu Bwongereza, nyuma yo guhesha iyi kipe igikombe cya shampiyona y’Abongereza yaherukaga mu myaka 30 ishize.
Abahize abandi mu mupira w’amaguru bahembwa binyuze mu matora akorwa n’abatoza, ba Kapiteni n’abanyamakuru baba bahagarariye ibihugu byabo.
Mu matora y’uyu mwaka u Rwanda rwari ruhagarariwe n’Umutoza w’ikipe y’igihugu, Mashami Vincent, Visi-Kapiteni wayo, Tuyisenge Jacques cyo kimwe n’umunyamakuru Jean de Dieu Dukuze wa Fun Club.
Uko Mashami yatoye
Umukinnyi w’umwaka: Kevin De Bruyne (1), Sergio Ramos (2) na Robert Lewandowski (3).
Umutoza w’umwaka: Jürgen Klopp (1), Zinedine Zidane (2) na Marcelo Bielsa (3).
Abo Jacques Tuyisenge yatoye
Umukinnyi w’umwaka: Sadio (1) Mané, Mohamed Salah (2) na Lionel Messi (3).
Umutoza w’umwaka: Jürgen Klopp (1) , Zinedine Zidane (2) na Julen Lopetegui (3).
Abo Jean de Dieu Dukuze
Umukinnyi w’umwaka: Robert Lewandowski (1), Sadio Mané (2) na Sergio Ramos (3).
Umutoza w’umwaka: Hans Flick (1), Julen Lopetegui (2) na Jürgen Klopp (3).
Mu bagore Kapiteni w’ikipe y’igihugu ‘Amavubi’ Umwaliwase Dudja yatoye Umwongerezakazi, Lucy Bronze wegukanye kiriya gihembo, amukurikiza Delphine Cascarino na Wendie Renard.
Habimana Sosthene utoza Amavubi y’abagore we yatoye Wendie Renard, Lucy Bronze amugira uwa kabiri na ho Jennifer Hermoso amugira uwa gatatu.
Umunyamakurukazi wari uhagarariye u Rwanda ni Clarisse Uwimana watoye Uwimana Clarisse Lucy Bronze, Delphine Cascarino na Ji So-yun.
