Ishyirahamwe ry’Umupira w’Amaguru ku Isi (FIFA) ryongeye kunengwa ku buryo ryafashe icyemezo ku kirego cya Nigeria cyashinjaga Repubulika Iharanira Demokarasi ya Congo (RDC) gukinisha umukinnyi utari wujuje ibisabwa, mu mikino yo gushaka itike y’Igikombe cy’Isi cya 2026.
RDC yabonye itike yo kwitabira iri rushanwa nyuma yo gusezerera Nigeria mu mikino ya kamarampaka. Amakipe yombi yanganyije igitego 1-1 mu mukino ubanza, mbere y’uko RDC itsinda Nigeria kuri penaliti 4-3 mu mukino wo kwishyura.
Nyuma yaho, RDC yakomeje urugendo rwayo maze itsinda Jamaica igitego 1-0, bituma ibona itike yo kujya mu Gikombe cy’Isi.
Mbere y’umukino wa nyuma, Ishyirahamwe ry’Umupira w’Amaguru muri Nigeria (NFF) ryari ryagejeje ikirego kuri FIFA, rivuga ko RDC yakinishije umunyezamu Lionel Mpasi atabyemerewe.
Nk’uko inyandiko zavuzweho n’ikinyamakuru The New York Times zibigaragaza, FIFA yari yarakoze isuzuma ku kibazo cya Mpasi, aho byagaragaye ko uyu mukinnyi yari yarigeze gukinira amakipe y’igihugu y’u Bufaransa mu byiciro by’abato.
Nubwo Nigeria yari yatanze ikirego, FIFA yagitesheje agaciro ishingiye ku kuba cyari cyatanzwe nyuma y’igihe cyagenwe n’amategeko.
Iki cyemezo cyakomeje guteza impaka, cyane cyane ko hari izindi ngero FIFA yigeze guhana amakipe kubera gukinisha abakinnyi batari bujuje ibisabwa.
Mu 2016, FIFA yigeze guha Turikiya intsinzi y’ibitego 3-0 nyuma y’uko u Bugereki bushinjwe gukinisha umukinnyi wari warakiniye Australia.
Nyuma y’imyaka ibiri, Bolivia na yo yahanishijwe gutsindwa imikino ibiri ku mpamvu zisa n’izo, nyuma yo gukinisha umukinnyi wari warigeze gukinira Paraguay.
Nigeria ivuga ko kuba ikirego cyayo kitaremewe byagize uruhare rukomeye mu gutuma RDC ibona itike y’Igikombe cy’Isi cya 2026.