Umunyarwanda Cassa Mbungo André utoza ikipe ya Bandari FC yo mu kiciro cya mbere muri Kenya, yahembwe nk’umutoza wahize abandi muri iriya shampiyona mu kwezi kwa Gashyantare.
Ikipe ya Bandari FC kuri Twitter yayo yavuze ko kuba Cassa yahembwe nk’umutoza w’ukwezi nta gitunguranye kirimo, ishimangira ko ari ikimenyetso cy’uko ibyiza biri imbere.
Bandari FC iri kumwe na Cassa muri Gashyantare, yakinnye imikino ine ya shampiyona ya Kenya ntiyagira n’umwe itsinda cyangwa ngo iwunganye.
Iyi mikino irimo uwo Cassa n’abasore be batsinzemo igitego 1-0 Kariobangi Sharks bayisuye, uwo batsinzemo AFC Leopards ibitego 2-1 mu rugo, uwo batsinzemo Vihiga United ibitego 5-0 ndetse n’uwo batsinzemo Urinzi Stars ibitego 2-0 bayisuye.
Cassa Mbungo yahawe amashiringi ya Kenya 50,000 (arenga Frw 400,000) nk’ishimwe ry’uko yitwaye neza muri Gashyantare.
Uretse kuba Cassa yahembwe nk’umutoza mwiza w’ukwezi, rutahizamu wa Bandari atoza, William Wadri, yahembwe nk’umukinnyi mwiza w’ukwezi kwa Gashyantare.
Magingo aya Bandari FC iri ku mwanya wa gatanu muri shampiyona ya Kenya n’amanota 25, ikaba irushwa amanota abiri na AFC Leopards ya gatatu na Kariobangi Sharks ya kane.
Tusker ikinamo Umunyarwanda Emery Mvuyekure ni yo iyoboye iriya shampiyona n’amanota 35.
Kurikira ibiganiro n’amavidewo binyura kuri Bwiza TV
