Général de Brigade de Police Gahungu Bertin uri mu bapolisi bakomeye mu Burundi, yatawe muri yombi ejo ku wa Kane tariki ya 21 Kanama 2025.
Gahungu wigeze kuyobora iperereza ry’imbere mu Burundi (DDI), amakuru aturuka muri iki gihugu aravuga ko yaraye muri gereza y’urwego rw’iperereza iherereye hafi ya cathédrale Regina Mundi i Bujumbura.
Kugeza ubu ibyaha uyu mugabo wafatanwe n’abarinzi be akurikiranweho ntibiramenyekana.
Gen. Bertin Gahungu ni rimwe mu mazina azwi cyane mu Burundi, ndetse ari mu bashinzwe umutekano bashinjwa kugira uruhare mu mabi atandukanye yagiye akorwa n’inzego z’umutekano ndetse n’iz’iperereza.
Izina ry’uyu mugabo ryamamaye muri 2007, ubwo yari imbere mu bataye muri yombi Hon. Hussein Radjabu wari uherutse kwirukanwa mu buyobozi bukuru bw’ishyaka CNDD-FDD riyoboye igihugu.
Gahungu kandi muri uwo mwaka yashyizwe mu majwi ashinjwa kwica urubozo uwitwa Evariste Kagabo, kugira ngo yemere gushinja ibinyoma Hussein Radjab.
Muri Werurwe 2013 Bertin Gahungu yagenwe kuyobora igipolisi mu ntara z’uburengerazuba bw’u Burundi (commissaire région Ouest), ndetse nyuma y’umwaka umwe ashinjwa kuba ari mu bateguye igitero cyagabwe ku ngoro y’ishyaka MSD ahitwa mu Kinindo.
Ni igitero cyasize hanafashwe abarwanashyaka benshi ba MSD, barakubitwa, banafungwa imyaka itari mike.
Muri Gashyantare 2015, Bertin Gahungu yagenwe kuyobora iperereza mu gihugu hagati.
Kuva imyigaragambyo yo kwamagana Manda ya gatatu ya Pierre Nkurunziza itangiye muri Mata 2015, Gahungu ashinjwa kuba urwego yari abereye umuyobozi rwarakoze amarorerwa arimo kwica, gushimuta abantu bakaburirwa irengero, kubica urubozo, n’ibindi byinshi.
Yavuzwe mu mugambi wo gukorana n’imitwe igambiriye guhungabanya umutekano w’u Rwanda!
Mu Ukuboza 2021, Maj. (Rtd) Mudathiru Habib wakatiwe igifungo cy’imyaka 25 nyuma yo guhamywa ibyaha birimo iterabwoba, kwinjira mu mutwe w’ingabo utemewe n’ibindi byaha birimo kugambirira kugirira nabi ubutegetsi buriho, yabwiye The Chronicles ko Gen. Bertin Gahungu ari umwe mu bakiraga Abanyarwanda babaga baturutse muri Uganda akabashyira imitwe irimo uwa RNC yashakaga gukuraho ubutegetsi bw’u Rwanda.
Uyu mugabo yatawe muri yombi nyuma y’amezi make Perezida Evariste Ndayishimiye amukuye mu mirimo yakoragamo muri Ambasade y’u Burundi muri Leta Zunze Ubumwe za Amerika, aho yari akuriye ibikorwa bya gisirikare (defence attaché).
