General Kale Kayihura wabaye umuyobozi mukuru wa Polisi ya Uganda, yirutse ibilometero 21 yizihiza isabukuru y’umugaba w’ingabo za Uganda zirwanira ku butaka akaba n’umuhungu wa Perezida Yoweri Museveni, Lt Gen. Muhoozi Kainerugaba.
Tariki ya 23 Mata 2022 ni bwo i Kampala habaye ibirori byo kwizihiza isabukuru ya Gen. Kainerugaba, byaranzwe n’irushanwa ryo kwiruka ndetse n’umutambagiro w’abacuranzi n’abaririmbyi bari mu matsinda atandukanye.
Mu gitondo cy’uwo munsi Gen. Kayihura w’imyaka 66 y’amavuko, abarinzi be, abaturanyi be bo mu mudugudu wa Katebe, Kashagama mu karere ka Lyantonde na bo bagaragaye bitabiriye iyi siporo yo kwiruka, mu rwego rwo kwifatanya n’abandi muri ibi birori.
Muri videwo Bwiza yabonye, Gen. Kayihura n’abo bari kumwe bumvikana baririmba bati: “Songa mbele Mzee, songa mbere MK (impine ya Muhoozi Kainerugaba). Songa mbele!”
Nk’uko ikinyamakuru Nile Post kibivuga, Gen. Kayihura yasobanuye ko impamvu we na bagenzi be bizihiza isabukuru ya Gen. Kainerugaba ari ukugira ngo bashimire uyu muhungu wa Perezida Museveni ibikorwa byo guharanira ineza akomeje gukora.
Yagize ati: “Turi kwizihiza isabukuru ya 48 ye ku bw’umurimo w’ineza ari gukorera Uganda na Afurika.”
Kuva mu 2018 ubwo yakurwaga ku mwanya w’umuyobozi mukuru wa Polisi, Gen. Kayihura akurikiranwe n’ubutabera adafunzwe, ku byaba birimo kugira uruhare mu ishimutwa ry’abantu ku mpamvu zishingiye kuri politiki.
Tariki ya 15 Ukuboza 2021, Gen. Kainerugaba yamusabiye imbabazi kuri Perezida Museveni, asobanura ko ari umwe mu basirikare bakoreye igihugu, banagikundisha abandi.
Gen. Kainerugaba yagize ati: “Gen K Kayihura yari umwe mu bakada bihariye mu myaka y’1990 batumye dukorera igihugu. Abandi ni ba nyakwigendera Gen Mayombo na Kazini. Niba yarakoze amakosa, tumukosore dukoresheje uburyo bw’impinduramatwara. Ndasaba Umugaba w’Ikirenga kumubabarira no kumugorora.”
Ubwo yiyamamarizaga umwanya w’Umukuru w’Igihugu muri Mutarama 2021, Perezida Museveni yasezeranyije abo ku ivuko rya Gen. Kayihura i Kisoro ko nibamutora, azasaba urukiko guhagarika kumukurikirana.
Inkuru yose https://bwiza.com/?Gen-Kainerugaba-yasabye-Perezida-Museveni-kubabarira-Kale-Kayihura
Mu gihe ategereje niba urukiko ruzahagarika kumukurikirana, Gen. Kayihura aherutse gutangira akazi k’ubwunganizi mu by’amategeko. Asanzwe afite impamyabumenyi y’icyiciro gihanitse cya kaminuza mu by’amategeko.
