Kundi la waasi wa M23 linaendelea na operesheni za kurejesha amani na usalama katika jiji la Goma, ambapo limeongeza misako iliyopelekea kukamatwa kwa watu kadhaa waliopatikana na silaha zisizoruhusiwa kisheria.
Operesheni hizi zilianza baada ya M23 kuchukua udhibiti wa Goma mwezi Januari mwaka huu, kwa lengo la kudhoofisha wanajeshi wa FARDC, FDLR na Wazalendo waliokataa kujisalimisha na kujificha kati ya raia wakiwa na silaha, wakihatarisha usalama wa jamii.
Katika eneo la Lac Vert, mkoba wa plastiki uliojaa risasi nyingi za bunduki aina ya Kalashnikov, maguruneti, na chaji mbili ulipatikana kando ya barabara ya Lushagala. Wananchi walitoa taarifa kwa vikosi vya M23 ambavyo vilifika haraka na kuchukua vifaa hivyo.
Mnamo Mei 13, watu wapatao 100 walikamatwa katika mitaa ya Ngangi 2 na Ngangi 3 kwa tuhuma za kuwa wapiganaji au kukosa vitambulisho halali. Walihamishiwa kwenye uwanja wa mpira wa Don Bosco katika eneo la Nyiragongo, ambako walichunguzwa. Waliobainika kuwa hawakuhusika waliachiwa huru, huku wengine wakikabidhiwa kwa vyombo vya usalama kwa uchunguzi zaidi.
Katika Kyeshero, karibu na kanisa la Centre Chrétien La Grâce, chaji mbili nyingine zilizojaa risasi zilipatikana na kuchukuliwa na maafisa wa usalama. Ndosho, mwanaume aliyevaa sare za kijeshi na anayedhaniwa kuwa mwanajeshi wa FARDC alikamatwa na kukabidhiwa kwa viongozi wa M23 kwa ajili ya uchunguzi.
Haya yanajiri baada ya operesheni nyingine kufanyika Mei 10 katika maeneo ya Ndosho, Kyeshero, na Himbi ambapo watu kadhaa waliodhaniwa kuwa wapiganaji wa FARDC, FDLR na Wazalendo waliokuwa wamejificha miongoni mwa raia walikamatwa.
Doria za usalama zinaendelea katika maeneo mbalimbali ya Goma kama vile Buhene, Don Bosco, Virunga, Katoyi, Kilijiwe na Office 1. Wananchi wanahimizwa kutoa taarifa kuhusu watu wanaotilia shaka.
Licha ya juhudi hizi, wakazi wengi bado wana wasiwasi kuhusu usalama wao, wakitaka kuwe na mikakati ya kudumu ya kurejesha amani ya kweli mjini Goma na viunga vyake.
