Guhagarikwa umwaka wose no gusubizwa mu cyiciro cyo hasi; ibihano ku ikipe izarenga ku mabwiriza ya Covid-19

Ishyirahamwe ry’umupira w’amaguru mu Rwanda FERWAFA ryatangaje ko ikipe bizagaragara ko yakoze uburiganya bugamije kwica amabwiriza mashya yo kwirinda ikwirakwira ry’icyorezo cya Covid-19, izahanishwa guhagarikwa umwaka wose kandi yagaruka igasubizwa mu cyiciro cyo hasi.

Iri shyirahamwe ryabitangaje mu butumwa buhakana amakuru avugwa ko hari amakipe yaba akinisha abakinnyi kandi ibisubizo by’ibipimo bafashwe bigaragaza ko banduye iki cyorezo, bigatuma banduza abandi.

Aya makuru yatanzwe n’Umuyobozi Mukuru wa Gasogi United Kakoza Nkuriza Charles (KNC) ubwo yavugaga ku bakinnyi be banduye Covid-19 ubwo iyi kipe ye yari imaze gutsindwa na Police FC ibitego 3-2.

KNC yagize ati: “Ariko na none nkaba nanasaba y’uko Federasiyo ikwiriye gupimira hano, abakinnyi bagapimirwa hano ku kibuga kuko hari amakuru avuga yuko hari amakipe ahisha uburwayi bwa Covid-19. Ibyo birahari kabisa ko hari amakipe ahisha yuko abakinnyi barwaye Covid-19, bakananduza n’abandi mu kibuga.”

FERWAFA nyuma yo kumenya ibyatangajwe na KNC, yagize iti: “FERWAFA iranyomoza aya makuru kuko nk’uko biteganywa n’amabwiriza yo kwirinda Covid-19, amakipe yose agaragariza umukozi uhagarariye FERWAFA kuri uwo mukino ibisubizo byafashwe n’inzego zibifiye uburenganzira mu gihe kitarenze amasaha 24.”

Gusa iri shyirahamwe rivuga ko ikipe izarenga kuri aya mabwiriza yashyizweho tariki ya 21 Kanama 2021 ikoresheje uburiganya, bikagaragazwa n’inzego zibifitiye ububasha, riti: “Iyo kipe izahanishwa guhagarikwa muri uwo mwaka w’amarushanwa kandi yazagaruka igahera mu kiciro cyo hasi.”