Ku itariki ya 30 Ugushyingo ni bwo Ingabo za Uganda zifatanyije n’iza Repubulika Iharanira Demokarasi ya Congo zatangiye kugaba ibitero ku birindiro by’inyeshyamba zo mu mutwe wa ADF i Beni mu ntara ya Kivu y’Amajyaruguru.
Ni ibitero byagabwe hifashishijwe indege z’igisirikare cya Uganda ndetse n’ibimodoka by’intambara.
Ingabo za Uganda n’iza RDC zivuga ko intego y’ibi bitero byiswe “Operasiyo Shujaa” yari ugusenya ibirindiro bya ADF biri muri Kivu y’Amajyaruguru ndetse n’ibizwi nka Kambi ya Yua byo muri Ituri byafatwaga nk’icyicaro gikuru cy’uriya mutwe ushinjwa kugaba Ibitero by’iterabwoba ku butaka bwa Uganda.
UPDF na FARDC bigambye gufata ibi birindiro byose, ndetse ibi bisirikare byombi bivuga ko hari abarwanyi ba ADF babarirwa muri 30 bahisemo kuyamanika.
Uretse gusenya ibirindiro bya ADF, Ingabo za Uganda n’iza Congo Kinshasa zari zinarajwe ishinga no kwica cyangwa gufata abarwanyi b’uriya mutwe, uhereye ku bayobozi bakuru bawo barangajwe imbere na Musa Baluku.
Ikinyamakuru ChimpReports cyo muri Uganda cyavuze ko mu makuru gifite ari uko mu bakomanda benshi b’umwe wa ADF nta wigeze uhitanwa n’ibitero by’indege za UPDF.
Impamvu ngo ni uko abenshi mu bakomanda b’uriya mutwe barangajwe imbere na Baluku bari mu bwihisho.
Ikindi ngo byamaze kugaragara ko abakomanda ba ADF batabana mu mashyamba n’abarwanyi babo, ibishobora kuba byarabarokoye.
Umwe mu basirikare bakuru ba Uganda bari gukurikirana Operasiyo Shujaa, yavuze ko abarwanyi ba ADF babaho mu buryo bw’ibanga cyane bigoranye kumenya.
Yunzemo ati: “Abakomanda babo ntabwo baba mu ishyamba ahubwo biberaho nk’abatware mu mijwi itandukanye ya RDC.”
Tariki ya 10 Ukuboza Umugaba w’Ingabo za Uganda zirwanira ku butaka, Lt Gen Muhoozi Kainerugaba, yanditse kuri Twitter avuga ko abayobozi bakuru ba ADF bataye abarwanyi babo.
Yabwiye abarwanyi b’uriya mutwe ati: “Abenshi mu bayobozi banyu bahunze amashyamba, hanyuma barabata babasiga mu bibazo. Nimuyamanike ubu mbere y’uko bibarangirana. Ingabo z’ibihugu byombi zizabakira zibahe amahirwe ya kabiri.”
Ababikurikiranira hafi basanga n’iyo abarwanyi bose b’uriya mutwe bicwa byagorana kuwurandura, kuko abayobozi bawo bongera gushaka abandi barwanyi bagashinga ibirindiro bishya.
Urugero rwiza ni mu gihe Gen Katumba Wamala yari Umugaba Mukuru w’Ingabo za Uganda, ubwo UPDF yagabaga ibitero bikomeye ku birindiro bya ADF.
Icyo gihe ubushobozi bw’uriya mutwe bwo guhungabanya umutekano wa Uganda bwaragabanutse cyane, ariko mu myaka itanu yakurikiyeho ADF yongeye kwinjiza no gutoza ibihumbi by’abarwanyi bashya.
Icyo gihe ni bwo uriya mutwe wanatangiye kugirana imikoranire n’umutwe w’iterabwoba wa ISIS.
Cyakora cyo hari amakuru avuga ko abarwanyi ba ADF bafashwe batanze amakuru y’imijyi abayobozi babo bihishemo, ku buryo ingabo za Uganda n’iza RDC ziteganya kujya kuyibahigamo.
