Uwahoze ari Jenerali mu ngabo za Ethiopia, Gen Tsadkan Gebretensae, ari ku isonga ry’inyeshyamba zirwanya Leta ya Ethiopia mu karere k’imisozi miremire ka Tigray mu majyaruguru y’icyo gihugu, nkuko byandikwa n’umusesenguzi Alex de Waal.
Gen Tsadkan, umukuru w’inyeshyamba zo muri Tigray, afatwa n’abasesenguzi b’umutekano ku rwego mpuzamahanga nk’umwe mu bazi cyane amayeri ya gisirikare bo mu rungano rwe ku mugabane w’Afurika. Ubuhanga bwe mu gusesengura no gupanga urugamba ndetse no gushobora gutuma abarwanyi bamwizera, byatumye mu mpera y’imyaka ya 1980 aba umwe mu bakuru b’ibikorwa byo ku rugamba b’uwo mutwe bubashywe cyane. Mu ntambara na Eritrea yatangiye mu 1998, Jenerali Tsadkan ni we wateguraga ibijyanye n’urugamba. Ni intambara yarwanywe mu buryo busanzwe (butandukanye n’ibitero-shuma) yaguyemo abantu bagera ku 80,000 bo ku mpande zombi zarwanaga. Mu kwezi kwa Gatandatu mu 2000, igitero cy’ingabo za Ethiopia cyashenye ibirindiro by’ingabo za Eritrea, nuko ingabo za Ethiopia zikwira hakurya y’umupaka. Jenerali Tsadkan yashakaga gukomeza kurwana kugeza ku murwa mukuru Asmara wa Eritrea, ariko Minisitiri w’intebe, Meles Zenawi, amutegeka kurekera aho, avuga ko intego z’intambara ya Ethiopia zagezweho, kandi ko Eritrea yacishijwe bugufi. Nyuma y’intambara, TPLF yacitsemo ibice kubera kutumvikana ku byari bigamijwe mu ntambara ndetse no ku cyerezo cya politiki y’ishyaka. Meles yirukanye Jenerali Tsadkan ku mwanya w’umukuru w’ingabo. Nk’umuntu ukuwe ku kazi mu buryo bwihuse kandi butunguranye, mu mwuga wari wararanze ubuzima bwe, agahabwa akato n’abakuru ba TPLF, ndetse agacungirwa hafi na ba maneko, Jenerali Tsadkan yagowe no kuba mu buzima nk’umuturage usanzwe. Ubuhanga bw’uyu mujenerali nibwo buri gutuma TPLF ishushubikanya ingabo za Leta, zikayabangira ingata. Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
XMA Header Image
Bwiza TV – YouTube
youtube.com
