Hirya no hino: Noheli isanze hari abari mu maganya yo kutigondera ibyo kurya

Ni muri urwo rwego Bwiza.com yageze mu bice bitandukanye ngo irebe uko umwuka w’imyiteguro y’Umunsi Mukuru wa Noheli wifashe. Ni ibice birimo iby’icyaro ndetse no mu Mujyi.

Muhima/Nyarugenge

Abaturage bigaragara ko nta byinshi mu by’imyiteguro bakoze. Nta kijyanye n’ibiti bya noheli abantu baguze, ni ubuzima busanzwe. Mu minsi ishize bagaragaje ko ibiribwa byahenze, ikiro cy’ibishyimbo cyavuye ku Frw 400 kigera ku Frw 1,000. Inyama ari nazo abantu bakunda kurya ku munsi mukuru imvange ni Frw 3,000 ku kiro, kivuye ku Frw 2,200.

Birumvikana ko bitoroshye kwigondera ibiribwa cyane ko umwe mu bacuruzi b’ibirayi mu Kagari k’Amahoro mu Mudugudu w’Inyarurembo yabwiye Bwiza.com ikiro cy’ibirayi cyiyongereyeho Frw 30 kubera iminsi mikuru. Cyavuye ku Frw 220 kijya 250 ku birayi byitwa Umweru na Kuruseke naho Kinigi yo yabaye iy’abifite kuko ikiro kimwe ari Frw 350.

Muri rusange ku Muhima bigaragara ko nta bidasanzwe biri kuba mu rwego rwo kwitegura Umunsi Mukuru wa Noheli. Mu mwaka ushize, byasabye ko ubuyobozi buza gutanga amabwiriza yo gushyiraho twa dutara twaka tumyatsa ku nzu z’ubucuruzi.

Kinyinya/Gasabo

Nkuko bisanzwe mu gihe nk’iki abantu benshi ku isi baba bari mu myiteguro yo kwizihiza Noheli, aho usanga abantu benshi bahaha ibiribwa ndetse n’imyambaro bazakoresha ku munsi nyirizina wa Noheli.

Kuri iyi nshuro si ko bimeze kuko aha mu Karere ka Gasabo umurenge wa Kinyinya ugerageje kugera kumaguriro usanga nta rujya n’uruza ruhari akenshi abaturage bavuga ko yaba ibiribwa cyangwa imyambaro byose bihenze kandi kubona amafaranga nabyo bitaboroheye.

Nta miziki ya Noheli byibuza mu ngo eshatu urasanga ari umwe uri gucuranga ibintu bisa n’ibyahinduye isura ugereranyije n’imyaka yashize.

Nyamirambo ku rya nyuma

Igihari ni uko mu mihana utamenya ko hari na Noheri yenda kuba! Imwe mu mpamvu nyamukuru ni ubukene bwiyongereyeho izamuka rikabije ry’ibiciro.

Ubusanzwe hari nk’abantu bakennye ariko bakoraga ibishoboka kugirango kuri noheri byibuze bazarye akaboga. Ubu ikiro ni 3700 frw, benshi iyi Noheri turayifata nk’indi minsi!

Ku rundi ruhande hari abandi bifite bazizihiza Noheri uko bisanzwe kuko abantu bose batareshya mu bushobozi ariko bakwiye kuzirikana abaturanyi babo bagasangira ku munsi nk’uyu ubusanzwe urangwa no guhana impano zitandukanye.

Rutonde / Rulindo

Umwe mu baturage yabwiye Bwiza.com ati ” Kera najyaga mbona muri karitsiye biteguye Noheli nk’ibirori bikaze cyane, bakabaga inka 10 ku gasanteri zigashira abantu bahaha, abana tukagurirwa imyenda kuri uyu munsi mukuru, ariko se ubukene bumeze gutya mu baturage bakwishima bate?”

Aho ndi ndabona nta kidasanzwe, abafundi n’abayede barimo kubaka abandi bari mu byabo, nta n’umuntu ndimo kumva avuga kuri iyo ngingo rwose, ibiribwa birahenze, mbese nta byishimo mbona ah!! Nanjye ubwanjye rwose ubu ndikubye, sinkeneye numbwira kuri iyo ngingo ya Noheli.”

Gatsibo/Rwimbogo

Imyiteguro ya Noheli nk’uko bisanzwe ijyana n’Ubunani, abakirisito biganjemo abo muri Kiliziya Gatulika, abo muri ADEPR n’abaprotestanti (EAR) ni bo biganza mu myiteguro y’iyi minsi mikuru, cyane Noheli.

Aba bakirisitu bagira imyiteguro mu minsi ibanziriza Noheli, aho mu gihe kingana n’iminsi itandatu, nka ADEPR bategura amasengesho aba guhera saa kumi z’igicuku kugeza ubwo tariki ya 25 Ukuboza igereye.

Ku bijyanye n’amafunguro bategura mbere ya Noheli, abenshi bahitamo kugura inyama, abandi bagahitamo gukora amatsinda, bakagura itungo (inka cyangwa ihene) bakaribaga tariki ya 24 Ukuboza, tariki ya 25 ikazagera bamaze gutegura amafunguro.

Hari n’abibumbira mu matsinda (cooperatives), umwaka ugatangira bakusanya amafaranga bazagabana umwaka urangiye, bakayifashisha mu kugura amafunguro, imyambaro ndetse no gukora imishinga ibyara inyungu.

Gusa hari abatabona ubushobozi bwo kugura amafunguro nk’inyama, bagahitamo kugura nk’ibishyimbo, ibirayi, inyanya, imboga rwatsi n’amavuta yo kubitekesha, kimwe n’abandi baba basaba Imana ko byibuze yabafasha kubona amafunguro yo kuri Noheli bitewe no kutagira ubushobozi.

Ni amashimwe kuri bamwe mu batuye muri aka karere kuko ubu hari abafite amasambu yabo bakuramo intonore z’ibishyimbo, bikaba byaborohera kugura ingereko, gusa ngo ho mu minsi ishize, akagemeri k’ibishyimbo (akanini gapima 1.5 Kg )kaguraga amafaranga ageze mu 1,300 RWF.

Ubunyobwa biri mu by’ibanze abatuye mu duce dutandukanye tw’aka karere bifashisha mu gutegura neza amafunguro ariko witegereje muri tumwe mu dusoko, ntaho ushobora kububona, aho buri mu mabutike bakabugurisha ku kiro (amafaranga 1500 RWF). Iki giciro ngo ntigisanzwe ku bantu bahinga ubunyobwa.

Hari umuco abenshi bashima, aho umuntu ufite ubushobozi yengaga ikigage cyangwa se ubushera, ubishoboye agategura n’amafunguro maze agatumira abaturanyi be bagasangira, umunezero ugasendera muri ako gace; kuva ku muto kugeza ku mukuru. Ariko ngo usa n’uwamaze gucika, buri wese yirebaho ku munsi wa Noheli, ufite agakoresha ibye, udafite akaba yanabwirirwa.

Bemeza ko Noheli Nziza ari ubusabane kuva mu nsengero kugeza mu ngo.

Uko imyitegiro ya noheri yifashe i Kampala muri Uganda

Umunyamakuru wacu uri i Kampala avuga ko abakirisitu bagaragaza ko biteguye ibyo kwizihiza ivuka rya Yesu. Imihanda yose ni uruvunga nzoka, imihanda yuzuye abantu bacacanamo bikoreye udukapu n’amashashi kuko hano ho yemewe.