Ikigo gishinzwe Ibiribwa n’Imiti mu Rwanda (FDA) cyakuye by’agateganyo ibyiciro bibiri by’umuti wa Unibrol (Aminosidine Sulphate USP 250mg) nyuma yo kuvumbura ibintu bidasanzwe mu buryo itangwa.
Unibrol ni imiti yo mu bwoko bwa antibiyotike (antibiotics) ikoreshwa mu kuvura indwara zo munda.
FDA ivuga ko iki cyemezo cyafashwe nyuma yo gukora isuzuma ritandukanye kuri iyi miti ryakorewe muri farumasi ziyicuruza ndetse n’ubushakashatsi bwakozwe mbere.
Nk’uko bigaragara mu itangazo ryashyizweho umukono n’umuyobozi mukuru w’iki kigo, Dr Charles Karangwa, ngo imiti yo mu byiciro bireba igomba gusubizwa mu bubiko mu gihe hagitegerejwe ko iperereza ryuzuye rirangira.
Ibyiciro by’iyi miti birebwa n’iki cyemezo ni 5806898 na 5806675 byombi byakozwe na UNIVERSAL Corporation Ltd ikorera muri Kenya nk’uko tubikesha The New Times.
Ati: “Twasanze iyi miti ifite ikibazo cyo guhindura ibara ku binini bimwe na bimwe; byo mu bwoko bumwe; ibifite ibara ry’umuhondo mu gihe ibindi bifite ibara ryera. Ni muri urwo rwego ibyiciro bikurikira byashyizwe mu kato mu gihe ubuyobozi bukomeje iperereza. ”
“Ikigo gishinzwe ibiribwa n’imiti mu Rwanda gitegeka abatumiza mu mahanga bose, amaduka y’ubuvuzi yo hagati, abadandaza, farumasi z’uturere, abadandaza, ibigo nderabuzima bya Leta n’abikorera ku giti cyabo bafite ibyiciro byavuzwe bya Unibrol (Aminosidine Sulphate USP 250mg) gushyira mu kato umubare wose uri mu bubiko bwabo kuzageza iperereza rirangiye. ”
Ikigo cy’igihugu gishinzwe ibiribwa n’imiti mu Rwanda cyashyizweho n’Itegeko Nº 003/2018 ryo ku wa 09/02/2018.
Kuva icyo gihe, imiti n’ibiribwa bitandukanye byagiye bihagarikwa ku isoko kubera kutuzuza ubuzirangenge.
Urugero, mu Ugushyingo 2019 Ikigo gishinzwe ibibwa n’imiti mu Rwanda (FDA) cyahagaritse imiti ya Paracetamol yakorewe muri Kenya kubera ibibazo by’ubuziranenge.
