Ingabo za Afurika y’Epfo (SANDF) ziri mu burasirazuba bwa Repubulika Iharanira Demokarasi ya Congo, zasabye umutwe wa M23 ubufasha burimo ubwo kwifashisha ikibuga mpuzamahanga cy’indege cya Goma bacyura imirambo ya bagenzi babo baguye mu ntambara.
Afurika y’Epfo ivuga ko imirwano yasakiranyije ingabo zayo na M23 mu bice bya Goma na Sake, yayitakarijemo abasirikare 16.
Izi ngabo cyo kimwe n’iz’ibihugu bya Tanzania na Malawi, zoherejwe n’umuryango wa SADC guha umusada FARDC yari isumbirijwe ku rugamba na M23.
Mu gihe inyinshi mu ngabo za RDC zirukanwe mu duce twa Goma na Sake izindi zigafatwa mpiri, Ingabo za Afurika y’Epfo zo M23 yazigoteye muri Kivu y’Amajyaruguru.
Ku wa Gatanu tariki ya 31 Mutarama, abayobozi ba M23 basuye bagenzi babo bo mu ngabo za Afurika y’Epfo baba mu kigo cya Mubambiro, mu burengerazuba bwa Goma.
Ubwo impande zombi zarimo ziganira abasirikare babazanyije amakuru y’urugamba, yemwe banahana numĂ©ro za Telefoni.
RBA ivuga ko umwe mu basirikare ba M23 ufite umuryango wahungiye muri kimwe mu bihugu byo mu karere yabajije bagenzi be bo muri Afurika y’Epfo impamvu bafatanya na Tshisekedi kurwanya abaturage be ndetse n’impamvu bafatanya ku rugamba n’umutwe wa FDLR, basubiza ko “ibyo biraturenze kandi dutekereza ko bishingiye ku nyungu za Politiki.”
Umwe mu basirikare ba Afurika y’Epfo nyuma yo guteguzwa n’umwe mu na M23 ko bashobora kuzongera gusakiranira i Bukavu, ngo yasubije ko atifuza gusubira ku rugamba ko ahubwo icyo yifuza kurusha ibindi ari ugusubira mu gihugu cye.
Ibiganiro by’impande zombi byasize Ingabo za SANDF zigejeje kuri M23 ibyifuzo bitatu, birimo icy’uko bakwemererwa gukoresha ikibuga cy’indege cya Goma mu rwego rwo gucyura imirambo ya bagenzi babo baguye ku rugamba.
Abanya-Afurika y’Epfo kandi basabye M23 kubemerera kujya mu bice barwaniyemo bagatoragura ibice by’imibiri ya bagenzi babo bahaguye, ndetse no kuborohereza kujya gufata ibiryo ndetse n’ibikoresho bibitse mu mujyi wa Goma; byaba ngombwa bakemererwa kubiherekeza bakoresheje ibifaru hirindwa ko hari ababatega bakabibambura.
M23 yijeje abasirikare ba SANDF ubufasha, gusa isaba abasirikare bayo ko ibyo bifuza bajya babicisha mu nyandiko.
