Perezida William Samoei Ruto wa Kenya ategerejwe i Kampala mu gihugu cya Uganda, mu ruzinduko rwe rwa mbere azaba agiriye mu mahanga nka Perezida wa Kenya.
Ruto ategerejwe muri Uganda mu ntangiriro z’ukwezi gutaha k’Ukwakira.
Byitezwe ko aha muri Uganda Perezida mushya wa Kenya azahitabira umuhango wo gutangiza imurikagurisha mpuzamahanga ku bucuruzi rizwi nka ‘Uganda International Trade Fair’ rizaba riba ku nshuro yaryo ya 28.
Ni imurikagurisha rizabera ku kibuga cy’i Lugogo kuva ku wa 03 kugeza ku wa 10 Ukwakira 2022.
Uruzinduko rwa Perezida William Ruto rwemejwe na Daniel Birungi usanzwe akuriye ihuriro ry’abanyenganda bo muri Uganda; wavuze ko Perezida wa Kenya ari we uzafungura ku mugaragaro ririya murikagurisha, mu gihe Perezida Yoweri Museveni ari we uzarifunga ubwo rizaba risozwa.
Perezida Ruto agiye kugenderera Uganda mu gihe bivugwa ko hari uruhare rutaziguye Perezida Yoweri Museveni yaba yaragize mu gutuma yegukana intsinzi mu matora y’Umukuru w’Igihugu.
Ibi bituma abenshi basanisha uruzinduko rwe i Kampala nk’umwanya wo kwitura Museveni ubufasha yamuhaye.
Perezida Yoweri Museveni ni umwe mu banyacyubahiro baheruka kwitabira umuhango w’irahira rya Perezida William Ruto i Nairobi, by’umwihariko ni na we wabimburiye abandi mu kugeza ijambo ku bari bitabiriye biriya birori.
Perezida Ruto ubwo yamwerekanaga nk’umwe mu bashyitsi bari bitabiriye umuhango w’irahira rye, yamusobanuye nk’ “umubyeyi w’akarere” ka Afurika y’Iburasirazuba.
Ruto agiye kugenderera Uganda nyuma y’umwaka urenga inzego zishinzwe abinjira n’abasohoka muri Kenya zimwangiye kujya muri iki gihugu, ngo kuko nta ruhushya yari abifitiye.
Muri Kanama umwaka ushize ni bwo yagombaga kujya muri Uganda ku mpamvu ze bwite, gusa bivugwa ko yagombaga guhura na Perezida Museveni.
Kuburizamo uru ruzinduko byatumye Urukiko rw’umuryango wa Afurika y’iburasirazuba (EACJ) rutumizaho intumwa nkuru ya Leta ya Kenya, Paul Kihara Kairuki, kugira ngo asobanure impamvu yatumye bibaho.
