U Buyapani bwatangaje ko bwohereje indege z'intambara mu kirere nyuma y'uko indege, bikekwa ko ari iy'u Burusiya, yinjiye mu kirere cyabwo mu gitondo cyo kuri uyu wa Kabiri, itariki 17 Ugushyingo 2026.
Koreya y'Epfo nayo yatangaje ko indege z'intambara zoherejwe, mu gihe Taiwan yavuze ko yafashe "ingamba zikwiye" nyuma y'uko indege za gisirikare z'u Burusiya zigaragaye hafi y'ikirere cyayo.
Moscou ntacyo iratangaza kuri iki kibazo nk'uko inkuru dukesha BBC ivuga.
Ibi bikorwa byongeye kugaragaza ubushobozi bwa gisirikare bw'u Burusiya, mbere gato y'inama y'ubukungu ya APEC, iteganijwe kubera mu Bushinwa muri iki cyumweru, izahuza Perezida Vladimir Putin, Perezida w'u Bushinwa, Xi Jinping, na Perezida wa Amerika, Donald Trump.
Minoru Kihara, Minisitiri wungirije w'Inama y'Abaminisitiri y'u Buyapani, yasobanuye inzira indege z'u Burusiya zanyuzemo hafi y'Ikirwa cya Okinoshima, giherereye ku nkombe y'uburengerazuba bw'u Buyapani, nk'"ihonyora bikomeye ry'ubusugire bw'u Buyapani," yongeraho ko igikorwa nk'icyo "kidakwiye na gato."
Ikintu nk'icyo cyabaye mu 2024, ubwo indege y'Igisirikare cy'u Burusiya yinjiraga mu kirere cy'u Buyapani hafi y'Ikirwa cya Rebun, hafi ya Hokkaido.
Ntibirasobanuka neza niba ikirere cy'ibi bihugu bitatu bituranye kinjiriwe n'indege imwe cyangwa zitandukanye.
Ubwoba burimo kwiyongera hagati y'u Buyapani n'u Burusiya, ibihugu bibiri bimaze imyaka myinshi bitavuga rumwe ku birwa bimwe byo mu Nyanja ya Pasifika.
Mu minsi ishize, Moscou yashyize igitutu gikomeye ku Buyapani.
Muri Kanama, Vladimir Putin yasuye kimwe muri ibi birwa ku nshuro ya mbere, igikorwa cyamaganwe cyane n'umunyapolitiki w'Umuyapani, Sanae Takaichi. Mu Ukwakira, u Burusiya bwataye muri yombi umunyamakuru w'Umuyapani, bumushinja ubutasi.

