Ingabo za leta ya Ethiopia zisubije umujyi ndangamateka wa Lalibela wari warigaruriwe n’inyeshyamba zo muri Tigray, nk’uko ibinyamakuru bya leta bibitangaza. Iyi ni intsinzi iheruka kwigambwa na leta kuva Minisitiri w’Intebe Abiy Ahmed ubwe yajya kuyobora urugamba mu cyumweru gishize. Tigray People’s Liberation Front (TPLF) yatangaje ko yakoze “gusubira inyuma yateguye” ikava ahantu hamwe na hamwe. Lalibela, izwi cyane kubera insengero zubatse mu rutare zo mu kinyejana cya 13, yari yarafashwe n’izi nyeshyamba mu kwezi kwa munani. Ni ahantu ndangamateka y’isi hagenwe na UNESCO hari mu karere ka Amhara, hakururaga abakerarugendo benshi mbere y’iyi ntambara y’imbere mu gihugu yatangiye umwaka ushize. Yahereye mu majyaruguru mu ntara ya Tigray, nyuma ikwira ibindi bice bya Ethiopia ubwo TPLF yagabaga ibitero ngo igere kuri Addis Ababa mu majyepfo. Ubwoba bw’uko izi nyeshyamba zari hafi kwinjira i Addis bwatumye ibihugu birimo Amerika, n’Ubwongereza bisaba abaturage babyo kuva muri Ethiopia mu cyumweru gishize. Ariko ibihugu nk’Ubushinwa n’Uburusiya byo byavuze ko nta mpamvu y’uko abaturage babyo bataha. Kuwa gatatu mu gitondo, umuvugizi wa leta Legesse Tulu yasubiwemo n’ikinyamakuru cya leta avuga ko ingabo zizeye no kwisubiza umujyi w’ingenzi wa Dessie “mu gihe gito”. TPLF yafashe Dessie mu kwezi gushize, ibyabonetse nko gutsindwa gukomeye kuri leta kuko uwo mujyi uri mu masanganzira zijya i Addis Ababa n’ijya ku mupaka wa Djibouti, iburasirazuba. Indi mijyi yambuwe TPLF irimo Shewa Robit, muri 220km uvuye i Addis Ababa, nk’uko leta ibivuga. Televiziyo ibogamiye kuri leta kuwa kabiri yatangaje amashusho ya Abiy Ahmed mu myambaro ya gisirikare, ari kureba hakurya kure yifashishije indebakure. Yabwiye abasirikare ati: “Umwanzi yatsinzwe. Igisigaye ni ukubirukana no kubasenya.” Mu cyumweru gishize, umukuru wa TPLF Debretsion Gebremichael yandikiye ONU, avuga impungenge batewe n’ibitero bya ‘drones’ ku basivile.
Zimwe mu nyubako zihariye ziboneka mu Mujyi wa Lalibela
