Ingabo za Uganda mu myiteguro ya nyuma yo gutangira misiyo ya EAC muri RDC

Igisirikare cya Uganda cyatangaje ko ingabo zacyo ziri mu myiteguro ya nyuma yo kujya gutangira ubutumwa bw’amahoro bw’umuryango wa Afurika y’iburasirazuba (EAC) muri Repubulika ya Demukarasi ya Congo (RDC).

Iki gisirikare kizwi nka UPDF cyashyize amafoto y’abasirikare bacyo ku rubuga rwacyo bigaragara ko bari mu nkambi bamaze iminsi bahugurirwamo, gisobanura ko mu minsi iri imbere barasanga muri RDC bagenzi babo baturutse muri Kenya.

UPDF yagize iti: “Abasirikare ba UPDF iri mu myiteguro ya nyuma yo koherezwa muri RDC mu ngabo z’umuryango wa Afurika y’ibirasirazuba. Izi ngabo ziri mu mahugurwa ya nyuma mbere y’uko zijya mu burasirazuba bwa RDC kwiyunga n’iza Kenya zamaze kugera i Goma.”

Uganda isanzwe ifite ingabo mu ntara ya Kivu y’Amajyaruguru na Ituri, zagiye mu bikorwa bihuriweho n’ibihugu bibiri byo kurwanya umutwe w’iterabwoba wa ADF.