Inkambi ya Gihembe yari imaze imyaka 24 icumbikiye impunzi ibihumbi 12 z’abanyekongo yamaze gufungwa. Ni nyuma yaho impunzi zari ziyirimo zimuriwe mu Nkambi ya Mahama bitewe n’uko aho zabaga hashoboraga gushyira ubuzima bwazo mu kaga. Mu gitondo ni bwo impunzi 911 zari zisigaye zimuwe nk’uko RBA ibitangaza. Ku wa Mbere tariki 20 Nzeri 2021, impunzi zo mu Nkambi ya Gihembe mu Karere ka Gicumbi, zatangiye kwimurwa ku mugaragaro zijyanwa mu nkambi ya Mahama yo mu Karere ka Kirehe. Gahunda yo kwimura izo mpunzi z’Abanyekongo yari yarahagaritswe kubera ikibazo cy’abana biga bagombaga kurangiza umwaka w’amashuri, kuko hari abari barimuwe guhera muri 2020.
