Inzibutso 4 za Jenoside yakorewe Abatutsi zashyizwe mu murage w’Isi

Ishami ry’Umuryango w’Abibumbye ryita ku burezi, ubumenyi n’umuco (UNESCO), ryatangaje ko ryamaze kwandika mu murage w’Isi inzibutso enye za Jenoside yakorewe Abatutsi mu 1994.

Inzibutso UNESCO yemeje ko yamaze gushyira mu murage w’Isi harimo urwa Kigali ruri ku Gisozi, urwa Nyamata mu karere ka Bugesera, urwa Murambi mu karere ka Nyamagabe ndetse n’urwa Bisesero mu karere ka Karongi.

Icyemezo cyo gushyira ziriya nzibutso mu murage w’Isi cyafatiwe mu Nama ya 45 y’Inteko Rusange ya Komite yiga ku Murage w’Isi iri kubera mu Mujyi wa Riyadh muri Arabie Saoudite kuva ku wa 10 Nzeri kugeza ku wa 25 Nzeri 2023.

Izi nzibutso zije ziyongera kuri Parike y’Igihugu ya Nyungwe yashyizwe mu murage w’Isi ku wa Kabiri tariki ya 19 Nzeri.

Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, yagaragaje ko gushyira ziriya nzibutso mu murage w’Isi ari intambwe ikomeye u Rwanda rwateye mu rugendo rwo kurwanya ihakana n’ipfobya rya Jenoside yakorewe Abatutsi.

Yashimye ibihugu byashyigikiye u Rwanda, agaragaza ko intambwe yatewe ishimangira ko biri kumwe mu rugendo rwo kurwanya abahakana n’abapfobya Jenoside.

Ati: “Turabona ko izi nzibutso ari ahantu hakomeza kurwanya abahakana bakanapfobya Jenoside. Ndabashimiye ko mwadushyigikiye cyane. Ni umunsi ufatiweho icyemezo cy’amateka.’’

Yakomeje avuga ko u Rwanda “rwishimiye ko urugendo rwo gushaka ubutabera rukomeje gutanga umusaruro”, yungamo ko “UNESCO mu gukora ibi na yo iri kwifatanya natwe.”

Yavuze ko uyu ari umunsi w’amateka, kuko ari bwo bwa mbere Afurika yandikishije urwibutso mu murage w’Isi.

Yijeje ko urugendo rw’ubumwe n’ubwiyunge ruzakomeza kandi ko kwandikwa kw’izi nzibutso bizakomeza gutanga icyizere muri urwo rugendo.