Abantu barenga 1300 muri Iran banyoye ikiyobyabwenge cya ‘Methanol’ bikingira, banivura icyorezo cya Coronavirus, 300 muri bo kirabahitana. Ni nyuma y’amakuru y’ibihuha yakwirakwiye ku mbuga nkoranyambaga avuga ko ibisindisha nka Whisky, ubuki n’ubwoko butandukanye bwa ‘alcool’ nka Methanol. Ibi byatumye abaturage babyadukira, babinywa ku bwinshi, birengagije amabwiriza yatanzwe n’inzego z’ubuzima iwabo. Ikinyamakuru The Mirror kivuga hari abaturage bumvishe nabi amabwiriza yo kwirinda iki cyorezo yabasabaga gukoresha imiti y’amazi yica udukoko isigwa mu ntoki (Hand sanitizers), batangira kujya bayinywa batekereza ko yica aka gakoko mu mibiri yabo. Muri iki gihe Isi ihangayikishijwe na Coronavirus, hatangwa amakuru y’ubwirinzi, ibihuha nabyo bikaba byinshi. No mu Buhinde, hari abizera ko amaganga y’inka ashobora kubakingira cyangwa kubavura iki cyorezo. Hari kandi abizera ko hari imiti isanzwe ikoreshwa yavura iki cyorezo, gusa inzego zishinzwe ubuzima zagiye zibinyomoza zivuga ko imwe itarageragezwa. Iyo ni nka Chroloquine biteganyijwe ko izageragerezwa muri Afurika mu gihe cya vuba. Methanol ni iki? Methanol ni ikinyabutabire cyo mu bitembabuzi (liquid), kitagira ibara ndetse gishobora kwaka. Uyirebesheje ijisho cyangwa ukayihumuriza, ntaho itaniye na Ethanol (alcool isanzwe inyobwa) ariko Methanol yo ifite uburozi bwinshi ugereranyije n’ubwa Ethanol. Methanol igira ingaruka ku binyabuzima nk’inyamaswa n’umuntu, biramutse biyinyoye cyangwa se biyishyize ku mubiri ngo mu maso. Yangiza umwijima, igifu ndetse n’impyiko, byose bikaba byatera urupfu cyane bitewe n’ingano yinjiye mu mubiri.
