Ikigo Maritime Trade Operations Centre (UKMTO) cy’u Bwongereza cyatangaje ko andi mato abiri amaze kuraswaho mu muhora wa Hormuz kuri uyu wa Gatatu nyuma y’ubwato bwarashwe mbere. Iran kandi iravuga ko yafashe amato 2 nyuma yo kurasa atatu.
Icyo kigo kiyoborwa n’igisirikare kirwanira mu mazi cy’u Bwongereza cyavuze ko ubwato bwa kabiri bwarasiwe ku ntera ya kilometero 14 uvuye ku nkombe za Iran kandi ko bukiri aho bwarasiwe.
BBC yamenye ko ubwo bwato bw’ubwikorezi bwanditse ku gihugu cya Panama ariko ari ubwa kompanyi yo muri Leta Zunze Ubumwe z’Abarabu.
Igitero kuri ubu bwato gikurikiye ikindi cyagabwe nacyo uyu munsi n’Ingabo za Iranian Revolutionary Guard Corps (IRGC) ku bwato bw’u Bugereki bwitwa Epaminondas buri muri kilometero 27 uvuye ku mwaro wa Oman, nk’uko byatangajwe na UKMTO.
Nyuma, ubwato bwa gatatu nabwo bwarashweho burimo kugerageza guca mu Muhora wa Hormuz nk’uko BBC ibikesha ikigo Vanguard cy’ubutasi mu nyanja.
Ubwo bwato, MSC Francesca, nabwo bwa Panama bwarasiwe ku ntera ya kilometero 11 uvuye ku nkombe za Iran bwerekezaga hanze y’uwo muhora.
Vanguard ivuga ko MSC Francesca bwategetswe n’ingabo za IRGC za Iran guhita buhagarara aho bwari bugeze.
