Umutoza mukuru w’Iran, Amir Ghalenoei, yanenze uburyo ikipe ye iri gufatwa muri FIFA World Cup 2026 nyuma yo gutegekwa kuva muri Los Angeles ako kanya nyuma y’umukino banganyijemo na New Zealand ibitego 2-2.
Iran yari yifuza kuguma muri California ijoro rimwe nyuma y’umukino kugira ngo abakinnyi babone umwanya wo kuruhuka no kwiyubaka, mbere yo gusubira aho bacumbitse muri Tijuana muri Mexico. Gusa nyuma y’umukino yabwiwe ko igomba guhita ifata indege igasubira muri Mexico.
Ghalenoei yavuze ko iki cyemezo cyabangamiye cyane ikipe ye. Ati: “Nyuma y’umukino batubwiye ko tugomba guhita tugenda. Nyamara uyu ni umwanya wari ingenzi cyane wo kwiyubaka nyuma y’umukino. Barimo kudushyiraho inzitizi nyinshi, ariko ntituzemera ko biduca intege.”
Uyu mutoza yavuze ko Iran ari yo kipe iri guhura n’ibibazo byinshi kurusha izindi muri iri rushanwa.
“Ntekereza ko turi ikipe ikandamijwe kurusha izindi zose muri iri Gikombe cy’Isi. Ishyirahamwe ryacu ntiriri hano, itangazamakuru ryacu ntiriri hano, abayobozi bacu ntibari hano. Biragoye cyane.”
Iran yahuye n’ibibazo byinshi mbere y’iri rushanwa, birimo ibibazo bya visa ndetse no kwimura aho yari gukorera imyitozo nyuma y’uko itakiriye uburenganzira bwo kuba muri Leta Zunze Ubumwe za Amerika nk’uko yari yabiteganyije.
Nyuma y’umukino, Perezida wa FIFA, Gianni Infantino, yasuye abakinnyi ba Iran mu rwambariro maze abashimira ubutwari n’uburyo bakomeje guhagararira igihugu cyabo mu bihe bikomeye.
Yagize ati: “Mweretse isi yose ko muri mu Gikombe cy’Isi kandi ko mushoboye guhangana n’ibibazo. Isi yose iri kubakurikirana kandi murimo kwandika amateka.”
Iran isigaje indi mikino ibiri mu itsinda H, aho izakomeza guhatanira itike yo kugera mu cyiciro gikurikiraho nubwo ikomeje kuvuga ko iri guhura n’imbogamizi zidasanzwe hanze y’ikibuga.
