Umukinnyi Iranzi Jean Claude ukina asatira izamu, yagarutse mu kipe ya Rayon Sports nyuma yo kurangiza amasezerano ye mu kipe ya Aswan FC yari yari yarerekejemo nk’intizanyo.
Muri Mutarama uyu mwaka ni bwo Iranzi wari umaze amezi agera kuri arindwi muri Rayon Sports, yahagurutse i Kigali yerekeza mu Misiri aho yari agiye mu igeragezwa.
Ni igeragezwa uriya mukinnyi yatsinze, birangira ikipe ya Aswan FC yari yerekejemo imusinyishije amezi atandatu, ariko nk’intizanyo ya Rayon Sports.
Rayon Sports kuri Twitter yemeje ko Iranzi yagarutse mu rugo, aho agomba gufatanya na bagenzi be kwitegura shampiyona y’ikiciro cya mbere mu Rwanda izatangira ku wa Gatanu tariki ya 04 Ukuboza, aho Rayon Sports izatangira isura Rutsiro FC i Rubavu.
Rayon Sports yagize iti: “Iranzi Jean Claude yagarutse! IranziJean Claude yagarutse mu rugo nyuma yo kumara amezi atandatu mu misiri. Urakaza neza nanone ndwanyi.”
Iranzi Jean Claude ari mu mwaka we wa nyuma muri Rayon Sports, nyuma yo kuyigeramo muri Nyakanga umwaka ushize ku masezerano y’imyaka ibiri, avuye muri APR FC yari amazemo umwaka umwe n’igice nyuma yo kuyigarukamo avuye i Burayi aho yakinaga muri Slovakia ndetse akaba atarahiriwe muri Zesco United yo muri Zambia yari yamwifuje mbere yo kugaruka mu Rwanda.
