Ikiganiro mpaka hagati ya Donald Trump na Joe Biden bazahatanira kuyobora Leta zunze ubumwe za Amerika, cyaranzwe n’akajagari, guterana amagambo no gucanamo kenshi bigera n’aho umwe abwira undi ati “ziba.”
Ni ikiganiro cyabereye muri Leta ya Ohio mu ijoro ryakeye.
Iki kiganiro mpaka cyari gitegerejwe n’Isi yose cyabereye muri Leta ya Ohio, kikaba kibanze kuri Coronavirus, ubukungu, uko amatora azakorwa n’irondaruhu rikorerwa abirabura. Ikiganiro cyamaze iminota 90.
Perezida Trump yaciye mu ijambo kenshi Biden ari kuvuga (incuro 73), kugeza ubwo uyu amubwiye ati: “Waziba, wa mugabo we?!”
Amakusanyabitekerezo arerekana ko ari cyo kiganiro kibi cyane kibayeho mu mateka ya vuba y’abahataniye kuyobora Amerika, abantu 69% bavuze ko cyabateye umujinya.
Ikiganiro cyaranzwe no gushwana kwa hato na hato hagati ya Trump na Biden, ndetse no gushwana hagati ya Trump na Chris Wallace wari uyoboye ikiganiro wageze ubwo yihaniza Trump kwica amategeko y’ikiganiro.
Umudemokarate Joe Biden yanenze Trump uko yitwaye imbere ya Covid-19, amushinja kugira uruhare rukomeye mu byago imaze guteza.
Trump yamusubije ko yarwanye urugamba rukomeye na Coronavirus, ashimangira ko ubukungu buri “kuzahuka ku muvuduko nk’uw’inyuguti ya V”. Yashimangiye ko iyo biba ari ku bwa Biden ibintu byari kuba bibi kurushaho.
Biden yahise agira ati: “Twamusigiye ubukungu buhagaze neza, arabwangiza”, Trump na we ati: “Nagaruye imirimo 700,000″.
Perezida Trump yavuze ko imyigaragambyo yo kurwanya ivanguraruhu muri Amerika iri gukorwa n’abo ku ruhande rw’abademokarate aho kuba abarepubulikani ahagarariye, ibyakuruye impaka ndende ku mbuga nkoranyambaga aho abenshi bashinje Trump kutamagana irondaruhu rikorwa n’abazungu.
Ikiganiro mpaka hagati ya Trump na Joe Biden cyabaye, mu gihe hamaze iminsi havugwa amakuru y’uko Trump yanyereje imisoro.
Chris Wallace wari uyoboye ikiganiro yabajije Trump niba koko yarishyuye amadorali 750 yonyine y’imisoro, undi asubiza agira ati:”Nishyuye miliyoni z’amadorari. Nishyuye miliyoni $38 umwaka umwe. Nishyuye miliyoni $27 umwaka umwe”.
Biden yahise amusaba kwerekana ibyemeza ko yayishuye, maze Trump ati: “Uzabibona nibirangira”.
Ikusanyabitekerezo ryakozwe na CBS News na BBC News rivuga ko Joe Biden ari we watsinze iki kiganiro mpaka cya mbere cy’aba bakandida.
Ku batoye, 48% bavuze ko Biden yatsinze, naho 41% bavuga Trump, 10% bo bavuze ko baguye miswi.
Abanyamakuru bavuze kuri iki kiganiro cyarimo gucyocyorana cyane, bo bavuze ko uwatsinzwe nyawe ari igihugu, ndetse n’ikusanyabitekerezo risa n’iribihamya.
Abantu 69% batoye bavuze ko iki kiganiro cyabateye umujinya, 19% bavuga ko cyabateye kubona imbere atari heza. Ku byiza, 31% bavuze ko cyabaye icyo kubahugenza naho 17% ko cyabahaye amakuru.
Ikiganiro kikirangira Wallace yababajije Trump na Biden niba bazasaba ituze amatora arangiye, Biden avuga ko azategereza kugeza ibyayavuyemo bigenzuwe n’abigenga.
Trump we yongeye kugaragaza impungenge ku gutora n’iposita, asaba abamushyigikiye “kuzajya ahabarwa amajwi bakareba buri kimwe cyose neza”.
Aba bagabo bazongera guhura mu kiganiro mpaka kibanziriza icya nyuma tariki 15 Ukwakira i Miami muri Florida.
