Ikipe ya Simba Sports Club ibifashijwemo na rutahizamu Meddie Kagere, yatsinze Dodoma Jiji ibitego 2-0 biyifasha gukomeza kwirukanka kuri Young Africans.
Dodoma Jiji y’umutoza Irambona Masudi Juma wahoze atoza Rayon Sports, yari yasuye Simba kuri Stade ya Benjamin Mkapa ihatsindirwa ibitego 2-0.
Hari mu mukino w’umunsi wa 17 wa shampiyona ya Tanzania. Meddie Kagere yari yabanje ku ntebe y’abasimbura mbere yo kwinjira mu kibuga mu ntangiriro z’igice cya kabiri cy’umukino asimbuye John Bocco.
Byasabye umunota wa 74 w’umukino ngo Kagere anyeganyeze inshundura, ku mupira yari ahinduriwe na Peter Banda mbere yo gusimbuka akawutereka mu izamu n’umutwe.
Igitego cya Kagere cyaje nyuma y’icyo umunya-Zambia Clatous Chota Chama yari yatsinze ku munota wa 74 w’umukino.
Kagere yahise yuzuza ibitego bitandatu amaze gutsindira Simba muri uyu mwaka, bimushyira ku mwanya wa gatanu ku rutonde rw’abamaze gutsinda ibitego byinshi.
Ararushwa ibitego bine na Fiston Mayele wa Young Africans cyo kimwe na Reliant Lusajo wa Namungo FC bombi bamaze gutsinda ibitego 10; cyo kimwe na George Mpole wa Geita Gold ufite ibitego umunani.
Kagere aranganya ibitego n’abarimo Umurundi Saido Ntibazonkiza wa Yanga na Vitalisy Mayanga wa Polisi Tanzania.
Gutsinda Dodoma Jiji byatumye Simba ikomeza kuba ku mwanya wa kabiri by’agateganyo n’amanota 37. Iyi kipe iracyarushwa amanota umunani na Young Africans ya mbere ari na yo ihabwa amahirwe yo gutwara igikombe cya shampiyona cy’uyu mwaka.
