Rutahizamu Meddie Kagere, yafashije Simba Sports Club akinira kwegukana amanota atatu y’umunsi wa gatanu wa shampiyona ya Tanzania, nyuma yo gutsinda bigoranye Namungo FC igitego 1-0.
Igitego cy’umutwe cya Kagere cyo ku munota wa 95 w’umukino ni cyo cyafashije Simba y’umutoza Hitimana Thierry kwegukana amanota atatu y’uriya mukino.
Hari ku mupira yari ahinduriwe na myugariro w’ibumoso Mohammed Hussein, mbere yo kuwutereka mu izamu n’umutwe.
Kagere yarokoye Simba muri uyu mukino nyuma yo kwinjira mu kibuga ku munota wa 72 w’umukino asimbuye Kapiteni John Rafael Bocco.
Ni ku nshuro ya kabiri uyu rutahizamu w’Amavubi yacunguraga Simba Sports Club muri uyu mwaka w’imikino, dore ko mu kwezi gushize na bwo yavuye ku ntebe y’abasimbura akayifasha gutsinda Dodoma Jijii igitego 1-0.
Kuri ubu Simba ifite ibikombe bine bya shampiyona biheruka ikomeje kugorwa no kwitwara neza muri shampiyona, dore ko imikino itatu yose imaze gutsinda yabonyemo amanota atatu yiyushye akuya.
Simba SC yahise ifata umwanya wa kabiri muri shampiyona ya Tanzania n’amanota 11, ikaba irushwa amanota ane na Young Africans kugeza ubu itaratakaza umukino n’umwe.
