Umufaransa Karim Benzema, yabaye umukinnyi wa gatanu umaze gutsindira Real Madrid ibitego byinshi mu mateka yayo, nyuma yo kuyifasha gutsinda FC Valence ibitego 3-0 mu mukino w’umunsi wa 29 wa shampiyona ya Espagne wabaye mu ijoro ryakeye.
Ibitego bibiri bya Karim Benzema, na kimwe cya Marco Asensio winjiye mu kibuga asimbura, byari bihagije kugira ngo Real Madrid yegukane amanota atatu yayifashije gukomeza kotsa igitutu FC Barcelona bahanganiye igikombe cya shampiyona.
Benzema w’imyaka 32 y’amavuko, yahise yuzuza ibitego 243 amaze gutsindira Real Madrid byatumye ahita kuri Ferenc Puskas wari uwa gatanu watsindiye Real Madrid ibitego byinshi mu mateka yayo.
Umubiligi Eden Hazard yagize uruhare mu gitego cya mbere cya Benzema amuha umupira, mbere y’uko uyu Mufaransa atsinda ikindi gitego cy’akataraboneka.
Gutsinda FC Valence byatumye Real Madrid igira amanota 62, ikaba irushwa amanota abiri na FC Barcelona ya mbere ku rutonde rwa shampiyona ya Espagne imanuka mu kibuga kuri uyu wa gatanu ikina na Sevilla.
Abakinnyi batandatu ba mbere batsindiye Real Madrid ibitego byinshi mu mateka
1. Cristiano Ronaldo – 450
2. Raul Gonzalez (323)
3. Alfredo Di Stefano (308)
4. Santillana (290)
5. Karim Benzema (243)
6. Ferenc Puskas (242)
