Umufaransa Karim Benzema yongeye gutabara Real Madrid, nyuma yo kuyiheka ku mugongo we akayihesha intsinzi imbere ya Elche yari yayisuye.
Ni Madrid yari yakiriye Elche kuri Stade yitiriwe Di Stefano, mu mukino w’umunsi wa 27 wa shampiyona ya Espagne.
Umukino wageze ku munota wa 72 Elche iri imbere n’igitego 1-0 cyatsinzwe n’umutwe na Dani Calvo ku munota wa 61 w’umukino.
Byasabye umunota wa 73 ngo Karim Benzema yishyure iki gitego, mbere yo gutsinda icya kabiri cy’intsinzi mu minota y’inyongera.
Ni nyuma yo guhabwa umupira mwiza na Rodrygo bikarangira arekuriye ishoti rikomeye inyuma gato y’urubuga rw’amahina.
Benzema yaherukaga nanone gufasha Real Madrid ku cyumweru gishize, nyuma yo kuyishyurira igitego ku munota wa 88 w’umukino yakinagamo na Atletico Madrid.
Uretse kuba Benzema yarokoye Real Madrid, iyi kipe yanafashijwe ahanini n’impinduka umutoza Zinedine Zidane yakoze, yinjiza mu kibuga abarimo Luka Modric, Toni Kroos na Rodrygo.
Benzema nyuma y’umukino yavuze ko “Wari umukino utatworoheye, twakomeje kwataka birangira tubonye amanota atatu y’ingenzi. Tuzi ko turi gukinira igikombe cya shampiyona muri buri mukino dukina, ariko amakipe aza hano akugarira cyane ku buryo bigorana kuyameneramo.”
Gutsinda Elche byatumye Real Madrid ifata umwanya wa kabiri muri shampiyona ya Espagne n’amanota 57, ikaba irushwa amanota ane na Atletico Madrid ya mbere.
Iyi kipe kandi irarusha inota rimwe FC Barcelona iyikurikiye ku mwanya wa gatatu.
Kurikira ibiganiro n’amavidewo binyura kuri Bwiza TV
