Umunyapoliti w’Umunyakenya Sabina Wanjiru Chege uhagarariye abagore b’ishyaka Jubilee riri ku butegetsi mu Karere ka Murang’a yavuze ko mu mwaka w’2017, bibye amatora y’Umukuru w’Igihugu Uhuru Kenyatta yari ahatanyemo mu buryo bukomeye na Raila Odinga.
Sabina yabimenyesheje abaturage bo mu gace ka Isibuye mu Karere ka Vihiga kuri uyu wa 10 Gashyantare 2022, yamamaza umunyapolitiki Raila Odinga ushaka guhatanira umwanya w’Umukuru w’Igihugu mu matora ateganyijwe muri Kanama 2022.
Uyu munyapolitiki yavuze ko mu matora yabaye mu 2017, babashije kwiba amajwi, Perezida Kenyatta yegukana umwanya, bityo bafite ubushobozi bwo kubisubira, na Odinga akazicara kuri iyi ntebe.
Nk’uko yumvikana mu mashusho yatambutse kuri televiziyo NTV Kenya, Sabina yagize ati: “Mu 2017 twibye amajwi, dufite ubushobozi bwo kubikorera Raila.”
Perezida Kenyatta uri muri manda ya nyuma yamamaza Odinga bahuriye mu ihuriro bise Azimio la Umoja. Bitezweho uguhatana gukomeye hagati yabo na Visi Perezida, William Ruto na we wiyamamaza.
