Umunyapolitiki Tundu Lissu utavuga rumwe n’ubutegetsi bwa Tanzania, yatangaje ko agiye gutahuka nyuma y’imyaka itatu ari mu buhungiro.
Ku wa Gatanu tariki ya 13 Mutarama 2023 Lissu wahungiye mu Bubiligi yatangaje ko azagera muri Tanzania ku wa 25 Mutarama.
Tundu Lissu ni umwe mu bakandida bari bahanganye na Dr John Pombe Magufuli mu matora y’Umukuru w’Igihugu muri Tanzania yabaye mu 2020, bikaza kurangira atsinzwe ariko ntiyemere ibyayavuyemo.
Umwuka mubi hagati ye na Magufuli waje gutuma ahungira mu rugo rwa Ambasaderi w’u Budage muri Tanzania kubera impungege yagaragaje ku mutekano we, aho yavuye ahungira mu Bubiligi.
Lissu kandi ni umunyamategeko akaba umunyapolitiki mu ishyaka rya CHADEMA ritavuga rumwe n’ubutegetsi bwa Tanzania.
Uyu kandi akaba yabaye umudepite mu nteko ishinga amategeko ya Tanzania ahagarariye agace ka Singida kuva mu mwaka wa 2010.
Yemeje ko agiye kugaruka muri Tanzania nyuma y’uko muri Gashyantare umwaka ushize yari yahuriye i Bruxelles na Perezida Samia Suluhu Hassan.
