Urukiko Rukuru rwa Gisirikare rwa Makindye, muri Kampala rwashinje Brig. Gen. James Barigye Ruheesi hamwe n’abandi basirikare bakuru batatu bo mu Gisirikare cya Uganda (UPDF) gukoresha nabi lisansi yagenewe gukoresha mu kazi bakayikoresha mu nyungu zabo bwite.
Abaregwa barimo kandi Col. David Ocitti Kidega, Maj. Innocent Kikongo Mugumya, na Capt. Kenneth Labwon Kinyera. Abashinjacyaha bavuga ko hagati ya Nyakanga 2022 n’Ukuboza 2023, abo basirikare bakuru batwaye litiro zigera ku 270.000 za mazutu, zagenewe gukoreshwa mu kazi muri Kampala na Jinja, ku nyungu zabo bwite.
Perezida w’Urukiko, Brig Gen Richard Tukacungurwa, yatangaje ko ibyo bikorwa “byahungabanyije imikorere binyuranyije n’ingingo ya 1 n’iya 2 (b) z’amategeko agenga UPDF.” Nk’uko bigaragara ku rupapuro rwishyuza, amavuta yari agenewe ikigo cya Uganda Rapid Deployment Capability Centre (URDCC) hamwe n’ibindi bikorwa bya UPDF.
Igihe icyaha cyakorwaga, Brig. Gen. Barigye yari Komanda wa URDCC mu kigo cya gisirikare cyitiriwe Kadhafi muri Jinja; Col. Kidega yari umukozi Ushinzwe Ibikomoka kuri peteroli muri Joint Staff Logistics; mu gihe Maj. Mugumya yari umuyobozi ushinzwe gutwara abantu muri URDCC; naho Capt Kinyera akaba yari ashinzwe amasoko muri serivisi z’ubuzima za UPDF.
Abo basirikare bakuru uko ari bane bahakanye ibyo baregwa. Ubushinjacyaha buyobowe na Col. Raphael Mugisha, Capt Alex Lasto Mukwana, na Lt Phillip Olupot wa 2, bwabwiye urukiko ko iperereza riri hafi kurangira.
Brig. Gen. Tukacungurwa yimuriye uru rubanza ku itariki ya 29 Gicurasi 2026 nk’uko iyi nkuru dukesha Chimpreports isoza ivuga.
