Igihugu cy’u Burundi kuri uyu wa Kane cyakiriye inkingo za mbere za COVID-19, mu gihe ibihugu byinshi bikataje mu gukingira abaturage babyo kiriya cyorezo.
U Burundi bwashyikirijwe inkingo ibihumbi 500 zo mu bwoko bwa Sinopharm zakozwe n’igihugu cy’u Bushinwa, mu muhango wabereye i Bujumbura.
Ni nyuma y’igihe kirekire abategetsi b’u Burundi barakunze gukerensa kiriya cyorezo bihwihwiswa ko ari cyo cyahitanye uwari Perezida wa kiriya gihugu, Pierre Nkurunziza.
Minisiteri y’Ubuzima mu Burundi ibinyujije kuri Twitter yayo yavuze ko “gukingira COVID-19 bizatangira mu cyumweru gitaha biramutse bigenze neza.”
Guhindura umuvuno k’u Burundi byatumye igihugu cya Eritrea gisigara ari cyo gihugu rukumbi cya Afurika kitaratangira gukingira abaturage bacyo COVID-19, mu gihe Koreya ya Ruguru yo yakunze gushimangira ko nta bwandu bwa kiriya cyorezo bugaragara ku butaka bwayo.
Ni gake u Burundi bukunze gutangaza imibare y’abandura n’abahitanwa na COVID-19, gusa imibare iheruka gutangazwa n’Ishami ry’Umuryango w’Abibumbye ryita ku buzima (OMS) yerekana ko mu Burundi habarurwa abanduye COVID-19 babarirwa mu 19,441 n’abagera kuri 14 yishe.
Minisiteri y’Ubuzima y’iki gihugu yatangaje ko ku ikubitiro abazakingirwa ari abakora mu nzego z’ubuzima, abarengeje imyaka 60 y’amavuko barwaye indwara zidakira, abakorera ingendo hanze y’igihugu n’abakora ibikorwa by’ubukorerabushake.
Minisitiri w’ubuzima, YhaddĂ©e Ndikumana, yavuze ko inkingo u Burundi bwahawe n’u Bushinwa ntaho zihuriye n’izitezwe gutangwa na Banki y’Isi mu mpera z’uku kwezi.
