Koreya ya Ruguru yashyize hanze amafoto agaragaza umuyobozi wayo, Kim Jong-un, asura imurikagurisha ry'inkweto z'abana n'imyambaro y'abagore, nyuma y'uko ku mbuga nkoranyambaga hakwirakwiriye ibihuha bivuga ko yapfuye azize kuva amaraso mu bwonko.
Ibitangazamakuru bya Leta ya Koreya ya Ruguru byasohoye amafoto agaragaza Kim Jong-un asura imurikagurisha ry'inkweto z'abana n'imyambaro y'abagore, nyuma y'uko amakuru avuga ko yaba yarapfuye akwirakwiye ku mbuga nkoranyambaga.
Muri ayo mafoto, Kim agaragara areba inkweto z'abana n'ibikapu by'ishuri, anaganira n'abayobozi bari bamuherekeje. Ibitangazamakuru bya Leta byatangaje ko yasuye iryo murikagurisha ku wa Mbere, ariko ntibiremezwa mu buryo bwigenga ko amafoto yafashwe kuri uwo munsi.
Ibihuha by'urupfu rwe byatangijwe na Wanjun Xie, Umushinwa uba mu buhungiro ufitanye isano n'ishyaka ritavuga rumwe n'ubutegetsi bw'u Bushinwa, China Democracy Party. Mu butumwa yashyize ku rubuga rwa X, yavuze ko Kim Jong-un yagize ikibazo gikomeye cyo kuva amaraso mu bwonko, agahita ajya muri koma.
Xie yakomeje avuga ko abaganga b'inzobere bo mu bitaro bya Peking Union Medical College Hospital i Beijing mu Bushinwa boherejwe kumuvura, ariko ko uburwayi bwe bwari bukomeye ku buryo ngo yaje kwitaba Imana. Yongeyeho ko umurambo we wasubijwe muri Koreya ya Ruguru mu ibanga.
Icyakora, Xie ntiyatanze inyandiko z'ubuvuzi, abatangabuhamya bazwi cyangwa ibindi bimenyetso byigenga byemeza ibyo yatangaje. Nta gihamya yigenga igaragaza ko Kim Jong-un yapfuye, kandi inzego za Koreya ya Ruguru n'u Bushinwa ntizari zatangaje ko ibyo bivugwa ari ukuri.
Uyu mushinwa yanavuze ko u Bushinwa bwaba bwohereje abasirikare 9.000 i Pyongyang kubera impungenge z'uko urupfu rwa Kim rwateza ikibazo cy'izungura ry'ubutegetsi. Ibyo na byo ntibyemejwe n'amasoko yizewe.